13.05.2026 | 18:49
Եթե 2026-ին Նիկոլ Փաշինյանն ընտրվի, մեր ապագան «Արևմտյան Ադրբեջանն» ա․ Ռոբերտ Քոչարյան. ՏԵՍԱՆՅՈՒԹ
Ըմբշամարտի ԵԱ․ Ինչ իրավիճակ է Արթուր Ալեքսանյանի քաշային կարգում
23.04.2026 | 11:50
Ալբանիայի մայրաքաղաք Տիրանայում ավարտված հունահռոմեական ոճի ըմբշամարտի Եվրոպայի առաջնության 97 կգ քաշային կարգում ոսկե մեդալակիր է դարձել բուլղարացի Կիրիլ Միլովը։
Եզրափակիչում Միլովը 3։1 հաշվով հաղթել է հունգարացի Ալեք Շոկեին ու երկրորդ տարին անընդմեջ դարձել Եվրոպայի չեմպիոն։
Ռուսաստանը ներկայացնող Արթուր Սարգսյանը կիսաեզրափակիչում 1։7 հաշվով պարտվել է Կիրիլ Միլովին, իսկ բրոնզե մեդալի համար գոտեմարտում ուժեղ է գտնվել բելառուս Կիրիլ Մակսևիչից՝ 4։1։
Այս քաշային կարգում Հայաստանը ներկայացնում էր Հայկ Խլոյանը, որը մեկնարկային գոտեմարտում 3։8 հաշվով պարտվել էր Ալեք Շոկեին։ Խլոյանն անցկացրել էր նաև սփոփիչ գոտեմարտ, սակայն դարձյալ պարտվել էր ու ավարտել ելույթը։
Հիշեցնենք, որ Օլիմպիական խաղերի ոսկե, կրկնակի արծաթե, բրոնզե մեդալակիր, աշխարհի քառակի ու Եվրոպայի 7-ակի չեմպիոն Արթուր Ալեքսանյանը (97 կգ) Եվրոպայի առաջնությունը բաց էր թողել վնասվածքի պատճառով։
10 ըմբիշով մրցավայր մեկնած հունահռոմեական ոճի ըմբշամարտի Հայաստանի հավաքականը ելույթն ավարտել էր 1 ոսկե, 1 արծաթե ու 3 բրոնզե մեդալով։ Մալխաս Ամոյանը (77 կգ) 5-րդ տարին անընդմեջ դարձել էր Եվրոպայի չեմպիոն, մեծահասակների պայքարում նորամուտը նշած Սուրեն Աղաջանյանն (60 կգ) արժանացել էր արծաթե մեդալի, իսկ Կարեն Ասլանյանը (63 կգ), Սլավիկ Գալստյանը (67 կգ) և Գասպար Տերտերյանը (72 կգ) դարձել էին բրոնզե մեդալակիր։ ԵԱ-ին մասնակցել էին նաև Մանվել Խաչատրյանը (55 կգ), Սամվել Գրիգորյանը (82 կգ), Գևորգ Թադևոսյանը (87 կգ) և Ալբերտ Վարդանյանը (130 կգ):
