ԱՄՆ ռազմածովային ուժերի հրամանատարն ազատվել է պաշտոնից

ԱՄՆ ռազմածովային ուժերի հրամանատար Ջոն Ֆելանը լքում է պաշտոնը, X-ում հայտնել է Պենտագոնի խոսնակ Շոն Փարնելը, գրում է Meduza-ն։

«Նախարարի և փոխնախարարի անունից մեր երախտագիտությունն ենք հայտնում Ֆելանին՝ նախարարությանը և ԱՄՆ ռազմածովային ուժերին մատուցած ծառայության համար»,- գրել է նա։

Ֆելանի տեղակալ Հուն Կաոն կծառայի որպես ռազմածովային ուժերի հրամանատարի պաշտոնակատար։ Հրաժարականի պատճառները հայտնի չեն։

CNN-ը նշում է, որ Ֆելանի հրաժարականը տեղի է ունենում ԱՄՆ-ի կողմից Հորմուզի նեղուցի շարունակական շրջափակման ֆոնին, որտեղ Ռազմածովային ուժերը կարևոր դեր են խաղում։ Axios-ի աղբյուրներն էլ նշում են, որ Ֆելանի պաշտոնանկությունը «շատերին անակնկալի է բերել»․ նա միանում է այն զինվորական պաշտոնյաների ցանկին, ովքեր Դոնալդ Թրամփի երկրորդ ժամկետի ընթացքում «կա՛մ կտրուկ հրաժարական են տվել, կա՛մ ստիպված են եղել լքել պաշտոնները»։

«Ֆելանը չէր հասկանում, որ ինքը գլխավորը չէ։ Նրա առաջադրանքը տրված հրամանները կատարելն էր, այլ ոչ թե հրամաններ տալը»,- ասել է Axios-ի աղբյուրներից մեկը՝ հավելելով, որ Ֆելանը «լեզու չէր գտնում» Պենտագոնի ղեկավար Փիթ Հեգսեթի հետ։

CNN-ի մի քանի աղբյուրներ նույնպես հաղորդում են Հեգսեթի և Ֆելանի միջև լարվածության մասին: Մի աղբյուր նշել է, որ Հեգսեթը կարծում է՝ Ֆելանը չափազանց դանդաղ էր առաջ շարժվում նավաշինության բարեփոխումների իրականացման գործում: Հեգսեթին նաև նյարդայնացնում էր Ֆելանի և Թրամփի միջև ուղիղ շփումներից, որոնք Պենտագոնի ղեկավարը համարում էր իրեն շրջանցելու փորձ: Միաժամանակ, Ֆելանին աշխատանքից ազատելու որոշումը, ըստ հեռուստաալիքի աղբյուրների, կայացրել է ինքը՝ Թրամփը, որը դժգոհ էր նավաշինության ծրագրի տեմպից:

Հաղորդվում է նաև, որ որպես Ռռազմածովային ուժերի ղեկավար՝ Ֆելանը զբաղվում էր «Ոսկե նավատորմի» ստեղծմամբ, որը պետք է կառուցվեր նոր նավերի, այդ թվում՝ «Թրամփ» դասի մարտանավերի մեջ զգալի ներդրումների միջոցով։

Թրամփը հայտարարել էր, որ հաստատել է երկու նոր ռազմանավի կառուցումը՝ ապագայում մինչև 25-ը կառուցելու ծրագրերով:

«Դրանք կլինեն ամենաարագը, ամենամեծը և, անկասկած, 100 անգամ ավելի հզոր, քան երբևէ կառուցված որևէ ռազմանավ»,- հայտարարել էր ԱՄՆ նախագահը անցյալ տարվա դեկտեմբերին:

Նշենք, որ ապրիլի սկզբին Հեգսեթը պաշտոնից ազատել էր ԱՄՆ բանակի շտաբի պետ Ռենդի Ջորջին ու երկու այլ զինվորական ղեկավարների:

Թարգմանությունը՝ Էմմա Չոբանյանի