02.07.2026 | 12:50
Չեմ վերցնի մանդատը, ուզում եմ հանգստանալ. Ալեն Սիմոնյան․ ՏԵՍԱՆՅՈՒԹ
ԵՄ դեսպանները հաստատել են Ուկրաինայի համար վարկը և ՌԴ-ի դեմ պատժամիջոցների 20-րդ փաթեթը
Քաղաքականություն
22.04.2026 | 18:03
ԵՄ անդամ պետությունների դեսպանները հաստատել են Ուկրաինայի համար 90 միլիարդ եվրոյի վարկը և Ռուսաստանի դեմ պատժամիջոցների 20-րդ փաթեթը, մեկնարկել է պաշտոնական գրավոր ընթացակարգը։ Այս մասին հաղորդում է «Ազատություն» ռադիոկայանի ուկրաինական ծառայությունը ԵՄ Խորհրդի քվեարկությունից հետո, գրում է Current time-ը։
ԵՄ-ն համաձայնել էր 2026-2027 թվականների համար Ուկրաինային տրամադրել 90 միլիարդ եվրոյի աջակցության վարկ դեռևս 2025 թվականի դեկտեմբերին, առաջին տրանշը պետք է փոխանցվեր ապրիլի սկզբին։ Սակայն մարտին ԵՄ առաջնորդները վերջնականապես չհաստատեցին վարկի հաստատումը. այն արգելափակվել էր Հունգարիայի վարչապետ Վիկտոր Օրբանի կողմից, որը ռուսամետ դիրքորոշում ուներ։ Օրբանը վերջերս պարտվել է խորհրդարանական ընտրություններում Պետեր Մագյարին. Հունգարիայի նոր առաջնորդը խոստացել է չարգելափակել Կիևին տրամադրվող վարկը։
«Այսօր ԵՄ դեսպանների օրակարգում ներառվել և հաստատվել են ինչպես Ուկրաինային տրամադրվող 90 միլիարդ եվրոյի վարկը, այնպես էլ ՌԴ-ի դեմ 20-րդ պատժամիջոցների փաթեթը։ Դրանք այժմ կանցնեն գրավոր ընթացակարգ՝ Ռադայի կողմից վերջնական հաստատման համար»,- Բրյուսելում քվեարկությունից հետո հայտարարել է Կիպրոսի ներկայացուցիչը։
Գրավոր հաստատման ընթացակարգը, ինչպես սպասվում է, կավարտվի արդեն ապրիլի 23-ին։
Նախորդ օրը եվրոպական դիվանագիտության ղեկավար Կայա Կալլասը կարծիք էր հայտնել, որ Ուկրաինային 90 միլիարդ եվրո վարկ տրամադրելու հարցը շուտով կլուծվի։ Նա նշել էր այս գործընթացում «նոր խթանի» մասին Հունգարիայում կայացած ընտրություններից հետո։ Ուկրաինայի նախագահ Վլադիմիր Զելենսկին ապրիլի 21-ին նույնպես հայտարարել էր, որ ակնկալում է, որ Ուկրաինային խոստացված վարկը շուտով կտրամադրվի, քանի որ Կիևն ավարտել է «Դրուժբա» նավթամուղի վերանորոգումը, ինչը թույլ է տվել վերսկսել դրա գործունեությունը։
Մագյարը նշել էր, որ կհանի Օրբանի վետոն Կիևին տրամադրվող վարկի հետ կապված, սակայն ասել էր, որ Հունգարիան ֆինանսապես պատասխանատու չի լինի վարկի համար և դեմ է ԵՄ-ին Ուկրաինայի արագացված անդամակցությանը։
Թարգմանությունը՝ Էմմա Չոբանյանի
