Միլանի դատախազությունը հետաքննություն է սկսել մի ընկերության նկատմամբ, որը կասկածվում է մարմնավաճառության և ուրախացնող գազով երեկույթներ կազմակերպելու մեջ: Այդ գործով անցնում են Իտալիայի Ա Սերիայի շուրջ 70 ֆուտբոլիստներ, որոնց թվում են «Ինտերի», «Միլանի» և «Յուվենտուսի» խաղացողներ, հաղորդում է Gazzetta dello Sport-ը։
Երեկույթները տեղի են ունեցել ինչպես Իտալիայում, այնպես էլ Հունաստանի Միկոնոս կղզու շքեղ հյուրանոցներում և գիշերային ակումբներում։ Դրանք կազմակերպել են երկու կասկածյալներ՝ Էմանուելե Բուտինին և Դեբորա Ռոնչին, որոնք ամուսիններ են։ Երկուսն էլ տնային կալանքի տակ են՝ սեռական ծառայություններ կազմակերպելու և այդ գործունեությունից ստացված փողերը լվանալու համար։
Նաև բացահայտվել են հետաքննության տակ գտնվող անձանց միջև դրամական փոխանցումներ, դրանցում ներգրավված են եղել հայտնիներ, գործարարներ և Ֆորմուլա-1-ի արշավորդներ։
Հարկ է նշել, որ Իտալիայում մարմնավաճառությունը չի համարվում հանցագործություն։ Այնուամենայնիվ, օրենքը սահմանում է, որ այլ անձանց կողմից մարմնավաճառության կազմակերպումը և շահագործումը անօրինական է։
Դատախազությունը կարծում է, որ գործակալությունը սկսել է կազմակերպել այդ միջոցառումները 2019 թվականին և շարունակել է դրանք անցկացնել նույնիսկ COVID-19 համավարակի ժամանակ։ Ականատեսը հայտնել է, որ կարանտինի ընթացքում ընկերության գլխավոր գրասենյակում գործել է անօրինական գիշերային ակումբ։
Գործակալությունը կանանց ստիպել է մարմնավաճառության զբաղվել՝ ապրելով Միլանի գլխավոր գրասենյակում և վճարելով նրանց կացարանի համար։ Նրանք ընտրվել են ֆուտբոլիստների կողմից և ստացել են վարձատրության 50 տոկոսը, իսկ մնացածը փոխանցվել է Բուտինիին և Ռոնչիին։ Նախնական գնահատականները ցույց են տալիս, որ ներգրավված է եղել տարբեր տարիքի և ազգության ավելի քան 100 կին։
