20.04.2026 | 20:37
Սարյան փողոցում 21:00-ից հետո մայթերին հարակից հատվածներում ավտոմեքենաներ կայանելն արգելվում է
Առավել ջանքեր կգործադրեմ Հայաստան-ՆԱՏՕ համագործակցության զարգացման ուղղությամբ. Քևին Համիլթոնը՝ ՀՀ նախագահին
Քաղաքականություն
20.04.2026 | 19:13
Հանրապետության նախագահ Վահագն Խաչատուրյանն ընդունել է Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Քևին Համիլթոնին։ Քևին Համիլթոնը նշել է, որ առավել ջանքեր է գործադրելու Հայաստան-ՆԱՏՕ համագործակցության զարգացման, ինչպես նաև տարածաշրջանում կայունության և անվտանգության ամրապնդման ուղղությամբ։ Այս մասին տեղեկացնում են ՀՀ նախագահի աշխատակազմից։
Շնորհավորելով հատուկ ներկայացուցչին նշանակման կապակցությամբ՝ նախագահը բարձր է գնահատել Հայաստան-ՆԱՏՕ հարաբերությունների շարունակական զարգացումը։
«Գոհունակությամբ եմ նշում, որ Հայաստանը և ՆԱՏՕ-ն իսկապես կարողացել են ստեղծել ամուր հիմք ավելի ամուր գործընկերության համար։ Մենք պահպանում ենք բավականին ակտիվ երկխոսություն և համագործակցություն ՆԱՏՕ-ի և դաշնակից երկրների հետ, և հուսով եմ, որ Ձեր պաշտոնավարման ընթացքում մենք առավել կընդլայնենք համատեղ նախաձեռնություններն ու ծրագրերը»,- նշել է Հանրապետության նախագահը։
Հանդիպման ընթացքում կողմերը քննարկել են տարբեր ձևաչափերում արդյունավետ համագործակցության հնարավորությունները՝ ընդգծելով քաղաքական բարձր մակարդակի երկխոսության դրական դինամիկան։
Մտքեր են փոխանակվել ժողովրդավարության և ժողովրդավարական արժեքների պաշտպանության ուղղությամբ ջանքերի միավորման կարևորության շուրջ՝ շեշտադրելով ինստիտուցիոնալ զարգացման, օրենքի գերակայության ամրապնդման և կառավարման թափանցիկության բարձրացման ոլորտներում համատեղ աշխատանքի նշանակությունը։ Այս համատեքստում կարևորվել է նաև լավագույն փորձի փոխանակումը և համապատասխան ծրագրերի շարունակական զարգացումը։
Նախագահն ընդգծել է, որ ՆԱՏՕ անդամ առանձին պետությունների հետ Հայաստանի սերտ համագործակցությունը շարունակում է ընդլայնվել՝ ընդգրկելով ինչպես քաղաքական, այնպես էլ պաշտպանական և ռազմական ոլորտներ։ Նրա խոսքով՝ այդ համագործակցությունը կարևոր դեր ունի երկրի կարողությունների զարգացման, բարեփոխումների առաջմղման և տարածաշրջանային անվտանգության ամրապնդման գործում։
Կողմերը վերահաստատել են փոխադարձ պատրաստակամությունը՝ շարունակելու կառուցողական երկխոսությունը և զարգացնելու գործընկերությունը՝ ուղղված խաղաղության, կայունության և անվտանգ միջավայրի ձևավորմանը տարածաշրջանում։
