Ալբանիայի մայրաքաղաք Տիրանայում մեկնարկած հունահռոմեական ոճի ըմբշամարտի Եվրոպայի առաջնության մրցումային առաջին օրը պայքարի մեջ են մտել Հայաստանի հինգ ներկայացուցիչներ, որոնից երկուսը դուրս են եկել կիսաեզրափակիչ։
Մանվել Խաչատրյանը (55 կգ) պայքարը սկսել է քառորդ եզրափակիչից և 7։3 հաշվով հաղթել Ուկրաինայի ներկայացուցիչ Իվան Ստեֆանսկիին: Կիսաեզրափակիչում Խաչատրյանը կմրցի վրացի Վախթանգ Լոլուայի հետ։
Փարիզ-2024 Օլիմպիական խաղերի բրոնզե մեդալակիր, աշխարհի կրկնակի ու Եվրոպայի քառակի չեմպիոն Մալխաս Ամոյանը (77 կգ) տիտղոսի պաշտպանությունը սկսել է շվեդ Կառլ Բաֆի հետ գոտեմարտով ու հաղթել 4։0 հաշվով, իսկ քառորդ եզրափակիչում ժամկետից շուտ պարտության է մատնել Ուկրաինան ներկայացնող Իրֆան Միրզոևին՝ 10։0։
Երեկոյան մրցահերթում Մալխաս Ամոյանը եզրափակիչի ուղեգիրը կվիճարկի մոլդովացի Ալեքսանդրին Գուտուի հետ։
Կարեն Ասլանյանը (63 կգ) մեկնարկային գոտեմարտում ժամկետից շուտ 9։0 հաշվով պարտության է մատնել ռումինացի Ռազվան Արնաուտին, իսկ քառորդ եզրափակիչում 2։5 հաշվով պարտվել է ռուսաստանցի Սերգեյ Եմելինին:
Գևորգ Թադևոսյանը (87 կգ) մեկնարկել է 1/8 եզրափակիչից, որտեղ 0։9 հաշվով պարտվել է Նորվեգիայի ներկայացուցիչ Տուրփալ Բիսուլթանովին։
Ալբերտ Վարդանյանը (130 կգ) մեկնարկային գոտեմարտում 0։4 հաշվով պարտվել է Եվրոպայի 11-ակի ու աշխարհի 5-ակի չեմպիոն, թուրք Ռիզա Կայալփին։
Հունահռոմեական ոճի ըմբշամարտի Հայաստանի հավաքականի կազմում մրցավայր են մեկնել նաև Սուրեն Աղաջանյանը (60 կգ), Սլավիկ Գալստյանը (67 կգ), Գասպար Տերտերյանը (72 կգ), Սամվել Գրիգորյանը (82 կգ) և Հայկ Խլոյանը (97 կգ), որոնք պայքարի մեջ կմտնեն ապրիլի 21-ին։
