Իսրայելի ԱԳ նախարարը Լիբանանում իսրայելցի զինվորի կողմից Քրիստոսի արձանի վնասումն «ամոթալի» է անվանել

Իսրայելի ԱԳ նախարար Գիդեոն Սաարը Լիբանանի հարավում իսրայելցի զինվորի կողմից Հիսուս Քրիստոսի արձանի վնասումն «ամոթալի գործողություն» է անվանել և ներողություն խնդրել միջադեպի համար, հաղորդում է The Times of Israel-ը։

Երեկ սոցիալական ցանցերում լիբանանցի լրագրողի կողմից տարածված և Իսրայելի բանակի կողմից իսկությունը հաստատված լուսանկարում երևում է, թե ինչպես է զինվորը մուրճով կոտրում Հիսուս Քրիստոսի արձանը։

«Հարավային Լիբանանում Իսրայելի բանակի զինվորի կողմից քրիստոնեական կրոնական խորհրդանիշի վնասումը ծանր և ամոթալի է: Ես բարձր եմ գնահատում  Իսրայելի պաշտպանության բանակի  հայտարարությունը միջադեպը դատապարտելու և այս հարցի վերաբերյալ հետաքննություն անցկացնելու մասին»,- գրել է Սաարը X-ում։

«Ես վստահ եմ, որ այս տգեղ արարքը կատարողի նկատմամբ կձեռնարկվեն անհրաժեշտ խիստ միջոցներ: Այս ամոթալի գործողությունը լիովին հակասում է մեր արժեքներին: Իսրայելը երկիր է, որը հարգում է տարբեր կրոններն ու դրանց սրբազան խորհրդանիշները, պաշտպանում է հավատքների միջև հանդուրժողականությունն ու հարգանքը: Մենք ներողություն ենք խնդրում այս միջադեպի համար յուրաքանչյուր քրիստոնյայից, որի զգացմունքները վիրավորվել են»,- հավելել է նա:

Ավելի վաղ իսրայելական բանակը հայտարարել էր, որ սոցիալական ցանցերում շրջանառվող լուսանկարն իրական է և պատկերում է իր զինվորներից մեկին։

Արաբական լրատվամիջոցների հաղորդմամբ՝ արձանը գտնվում է հարավային Լիբանանի Դեբլ քրիստոնեական գյուղում՝ Իսրայելի հետ սահմանի մոտ։ Իսրայելի բանակը հայտարարել է, որ միջադեպը դիտարկել է «մեծ խստությամբ»՝ հավելելով, որ «զինվորի վարքագիծը լիովին անհամատեղելի է իր զորքերից ակնկալվող արժեքների հետ»։

Թարգմանությունը՝ Էմմա Չոբանյանի