Հայ բռնցքամարտիկները մեծ դժվարությամբ են հասել Բրազիլ

Հայ բռնցքամարտիկները մեծ դժվարությամբ են ժամանել Բրազիլ, որտեղ ապրիլի 20-26-ին կմասնակցեն աշխարհի գավաթի խաղարկության առաջին փուլին, հաղորդում է ՀԲՖ մամուլի ծառայությունը։

«Բռնցքամարտի Հայաստանի հավաքականը մեծ դժվարությամբ հասել է Բրազիլի Իգուասու քաղաք, որտեղ կայանալու է WORLD BOXING-ի աշխարհի գավաթը։

Մեր ընտրանին նախ Lufthansa ավիաընկերության աշխատակիցների գործադուլների և անպատասխանատու վերաբերմունքի պատճառով ստիպված էր 2 օր մնալ Ֆրանկֆուրտում։ Այնուհետև Սպորտի կառավարման կենտրոնի միջնորդությամբ մեծ դժվարությամբ ձեռք են բերվել Ֆրանկֆուրտ-Սան Պաուլո-Իգուասու տոմսեր, բայց այդտեղ էլ եղել է չվերթի ուշացում, որի պատճառով թիմի մրցավայր հասնելը կրկին ձգձգվել է և Սպորտի կառավարման կենտրոնը ստիպված է եղել թիմի համար գնել Սան Պաուլո-Իգուասու նոր տոմսեր։ Ինչևէ մոտ 4 օր ճանապարհներին լինելուց հետո մեր բռնցքամարտիկները մրցավայրում են, իսկ աշխարհի գավաթին մասնակցում է 49 երկրի ներկայացուցիչ»,- նշված է հաղորդագրության մեջ։

Տղամարդկանց Հայաստանի հավաքականի կազմում մրցավայր են մեկնել Ռուդոլֆ Գարբոյանը (50 կգ), Ժիրայր Սարգսյանը (55 կգ), Արթուր Բազեյանը (60 կգ), Արթուր Սահակյանը (65 կգ), Արարատ Հարությունյանը (70 կգ), Նարեկ Մանասյանը (90 կգ) և Դավիթ Չալոյանը (+90 կգ)։ Կանանց պայքարում հանդես կգան Անուշ Գրիգորյանը (51 կգ) և Էլիդա Քոչարյանը (65 կգ)։

Ապրիլի 20-ին ռինգ դուրս կգա երեք հայ բռնցքամարտիկ։ Արթուր Բազեյանը կմրցեի Սանտիագո Կելիեսի (Արգենտինա) հետ, Նարեկ Մանասյանը՝ Վիլմեռ Ռոյասի (Վենեսուելա), իսկ Արարատ Հարությունյանը՝ Զակարիա Ռոմդհանիի (Թունիս)։