20.04.2026 | 14:31
Երևանում մեկնարկել է Plug and Play-ի ստարտափների աջակցության ծրագրի երրորդ փուլը
Ալիևը խոսել է Հայաստանի ու Ադրբեջանի միջև խաղաղության արդյունքներից և «Զանգեզուրի միջանցքից»
Քաղաքականություն
20.04.2026 | 11:39
Աճող աշխարհաքաղաքական լարվածությունը և սրվող հակամարտությունները բացահայտում են միջազգային խաղաղության և անվտանգության փխրունությունը։ Այս առումով, Ադրբեջանը վերահաստատում է իր անսասան հավատարմությունը պետությունների ինքնիշխանության և տարածքային ամբողջականության սկզբունքներին։ Այս մասին ասվում է Ադրբեջանի նախագահ Իլհամ Ալիևի ուղերձում՝ ուղղված ՄԱԿ-ի Ասիայի և Խաղաղօվկիանոսյան տարածաշրջանի տնտեսական և սոցիալական հանձնաժողովի 82-րդ նստաշրջանի մասնակիցներին:
«2021 թվականին այս հեղինակավոր հաստատությունում իմ ելույթից ի վեր Հարավային Կովկասում տեղի են ունեցել խորը փոխակերպումներ։ Ադրբեջանը լիովին վերականգնել է իր ինքնիշխանությունն ու տարածքային ամբողջականությունը և սկսել է խաղաղության օրակարգը Հայաստանի հետ։ Պատմական առաջընթաց է գրանցվել Ադրբեջանի և Հայաստանի միջև հարաբերությունների կարգավորման գործում անցյալ տարվա օգոստոսին ԱՄՆ նախագահ Դոնալդ Թրամփի կողմից կազմակերպված Վաշինգտոնի գագաթնաժողովում։ Այսօր մենք ականատես ենք լինում խաղաղության պտուղներին։ Ադրբեջանի և Հայաստանի միջև սկսվել են առևտրային հարաբերություններ, Ադրբեջանն այժմ տարանցիկ մուտք է ապահովում Հայաստանի համար։ Քաղաքացիական հասարակության ներկայացուցիչների փոխադարձ այցելությունները նպաստում են վստահության կառուցմանը»,- հայտարարել է նա։
Բացի այդ, ըստ Ալիևի, Ադրբեջանն ամրապնդում է իր դերը որպես խոշոր տրանսպորտային հանգույց։
«Ներկայիս աշխարհաքաղաքական միջավայրում Միջին միջանցքի կարևորությունը մեծանում է։ Զանգեզուրի միջանցքն ավելի կխթանի տարածաշրջանային կապը՝ Ասիան կապելով Եվրոպայի հետ, նպաստելով ավելի լայն տրանսպորտային, էներգետիկ և թվային ցանցերի ստեղծմանը՝ լիովին համապատասխանելով Ասիայի և Խաղաղօվկիանոսյան տարածաշրջանի տնտեսական և սոցիալական հանձնաժողովի առաջնահերթություններին»,- հայտարարել է Ալիևը։
Հավելենք, որ Վաշինգտոնում օգոստոսի 8-ին ստորագրված փաստաթղթերում «Զանգեզուրի միջանցք» եզրույթ օգտագործված չէ, կողմերի միջև չկա նման պայմանավորվածություն։ Դրանցում նշվում է «Թրամփի ուղու» (TRIPP) մասին, սակայն Բաքվի քարոզչամեքենան շարունակում է «միջանցք» եզրույթն օգտագործել՝ խեղաթյուրելով ստորագրված փաստաթղթերի բովանդակությունը։
Թարգմանությունը՝ Էմմա Չոբանյանի
