Զելենսկին պատրաստ է հանդիպել Պուտինի հետ Թուրքիայում՝ Էրդողանի և Թրամփի մասնակցությամբ

Ուկրաինայի նախագահ Վլադիմիր Զելենսկին պատրաստ է հանդիպել ՌԴ նախագահ Վլադիմիր Պուտինի հետ՝ Թուրքիայի նախագահ Ռեջեփ Թայիփ Էրդողանի և ԱՄՆ նախագահ Դոնալդ Թրամփի մասնակցությամբ։ Ուկրաինան հետաքրքրված է Թուրքիայում առաջնորդների հանդիպում անցկացնելու հարցով։ Այս մասին Անթալիայի դիվանագիտական ​​ֆորումում հայտարարել է Ուկրաինայի արտաքին գործերի նախարար Անդրեյ Սիբիհան։

«Մենք պատրաստ ենք Թուրքիայում Զելենսկի-Պուտին ձևաչափով առաջնորդների հանդիպման՝ Էրդողանի և Թրամփի մասնակցությամբ։ Մենք վերջերս այս ազդանշանը փոխանցեցինք մեր թուրք գործընկերներին։ Թուրքիան կարևոր դեր է խաղում խաղաղության ջանքերում»,- նշել է Սիբիհան։

Նրա խոսքով՝ ուկրաինական և ամերիկյան բանակցային թիմերը մշտական ​​կապի մեջ են։

«Մենք սպասում ենք ամերիկյան բանակցային թիմի այցին Ուկրաինա՝ հաջորդ քայլերը քննարկելու համար»,- հավելել է նա։

Միաժամանակ, ուկրաինացի պաշտոնյան ասել է, որ Կիևը ողջունում է ԱՄՆ-ի ջանքերը՝ արդար և համապարփակ խաղաղության հասնելու համար։

«ԱՄՆ-ի հետ մեր երկկողմ դիվանագիտական ​​հարաբերությունների ամենադժվար շրջանն արդեն անցյալում է։ Մենք կարողացել ենք այս հարաբերությունները հաստատել ճիշտ և գործնականորեն՝ հարգելով միմյանց դիրքորոշումները։ Ուկրաինան իսկապես առաջատար դիրք է գրավում»,- ընդգծել է Սիբիհգան։

Նա նաև կարծիք է հայտնել, որ Ռուսաստանի վրա ճնշումը պետք է մեծացվի․ «Սա խաղաղության ջանքերն արագացնելու միակ միջոցն է։ Մենք պատրաստ ենք հրադադարի։ Պուտինը պետք է գիտակցի, որ երբեք չի հասնի իր նպատակներին մարտադաշտում»։

Բացի այդ, Ուկրաինայի արտգործնախարարը նշել է երեք տարր, որոնք արտացոլում են մարտադաշտում առկա իրավիճակը։

«Մենք պահում ենք առաջնագիծը, փորձում ենք փակել երկինքը և գործում ենք ասիմետրիկ Ռուսաստանի դեմ։ Մարդկային ուժի թվային գերազանցությունն այլևս որոշիչ չէ մեր կողմից անօդաչու թռչող սարքերի օգտագործման շնորհիվ»,- հայտարարել է Սիբիհան։

Նա նաև կոչ է արել դադարեցնել Ռուսաստանի կողմից անօրինական զորակոչի արշավները․ «Ռուսաստանը, կորցնելով մեծ թվով զինվորներ, սկսել է օտարերկրացիների համար անօրինական զորակոչի արշավներ, հիմնականում՝ Աֆրիկայում և Ասիայում։ Ռուսաստանի համար կռված ավելի քան երեք հարյուր օտարերկրացիներ այժմ գտնվում են ուկրաինական գերության մեջ»։

Թարգմանությունը՝ Էմմա Չոբանյանի