Հարավային Կովկասն արդեն մտել է խաղաղության փուլ. Հաջիև

Հարավային Կովկասն արդեն մտել է խաղաղության փուլ։ Ադրբեջանական լրատվամիջոցների փոխանցմամբ՝ այս մասին Անթալիայի 5-րդ դիվանագիտական ​​ֆորումի շրջանակում կազմակերպված քննարկման ժամանակ հայտարարել է Ադրբեջանի նախագահի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևը։ Նա նշել է, որ Ադրբեջանի կողմից այսօր նախաձեռնված էներգետիկ նախագծերը ծառայում են համաշխարհային էներգետիկ անվտանգությանը՝ միաժամանակ պաշտպանելով տարածաշրջանային երկրների շահերը։

Հաջիևն ասել է, որ հայ-ադրբեջանական հակամարտության լուծումը հատկապես կարևոր է տարածաշրջանային տեսանկյունից։

Ադրբեջանի նախագահի օգնականն ընդգծել է, թե Ադրբեջանը քայլեր է ձեռնարկում Հայաստանի հետ հարաբերությունները կարգավորելու համար, և համապատասխան համաձայնագիրը նախաստորագրվել է անցյալ օգոստոսին՝ ԱՄՆ ղեկավարության մասնակցությամբ։

Հիքմեթ Հաջիևը հայտարարել է, թե, իբր, 30 տարի շարունակ ԵԱՀԿ Մինսկի խմբի կողմից տարածաշրջանին պարտադրված դրսից առաջարկվող կարգավորման մոդելը որևէ արդյունք չի տվել. «Սա ևս մեկ անգամ ցույց է տալիս, որ տարածաշրջանում իրական արդյունքների կարելի է հասնել միայն տեղական սուբյեկտայնության և ղեկավարության միջոցով»։

Նա հավելել է, թե տարածաշրջանում այժմ ձևավորվել է նոր ստատուս քվո, և Հարավային Կովկասը մտել է խաղաղության շրջան։ Միևնույն ժամանակ, Հաջիևը նշել է, որ մերձակա տարածաշրջանում ի հայտ են գալիս նոր հակամարտության գոտիներ։

Թարգմանությունը՝ Էմմա Չոբանյանի