Դավիթ Սանասարյանի արդարացման դեմ բողոքը կքննեն  դատավորներ Սուրեն Խաչատրյանը, Ժենյա Մելիքսեթյանն ու Արմեն Հովհաննիսյանը

Պետական վերահսկողական ծառայության նախկին պետ Դավիթ Սանասարյանի գործով վերաքննիչ բողոքը մակագրվել է Վերաքննիչ հակակոռուպցիոն դատարանի դատավոր Սուրեն Խաչատրյանին, կազմում են դատավորներ Արմեն Հովհաննիսյանը և Ժենյա Մելիքսեթյանը։ «Դատալեքս» դատական-տեղեկատվական համակարգում դեռևս տեղեկություն չկա  գործը վարույթ ընդունելու վերաբերյալ։

Նշենք, որ Սանասարյանի գործի քննությունն առաջին ատյանի դատարանում սկսվել է այն ժամանակ, երբ դեռևս ստեղծված չէր Հակակոռուպցիոն դատարանը, ուստի այն քննվել է ընդհանուր իրավասության քրեական դատարանում, սակայն ենթադրյալ կոռուպցիոն բնույթ ունեցող գործերով վերաքննիչ բողոքներն արդեն ուղարկվում են Հակակոռուպցիոն վերաքննիչ դատարան։ Այդ է պատճառը, որ ընդհանուր իրավասության քրեական դատարանի կայացրած դատական ակտի դեմ բողոքը քննվելու է Հակակոռուպցիոն դատարանում։

Հիշեցնենք, որ Երևանի քրեական դատարանի դատավոր Դավիթ Բալայանն արդարացրել  է ՊՎԾ-ում պաշտոնավարելիս ենթադրյալ չարաշահումներ կատարելու մեջ մեղադրվող Դավիթ Սանասարյանին։ Արդարացման դատական ակտի դեմ բողոք է ներկայացրել Դատախազությունը։

Ըստ մեղադրանքի՝ Սանասարյանը, հանդիսանալով Պետական վերահսկողական ծառայության ղեկավար, ունենալով ծառայության անմիջական ղեկավարումն իրականացնելու, ծառայության աշխատակիցներին նշանակելու և ազատելու, կարգապահական տույժի ենթարկելու, վերահսկվող օբյեկտներում ուսումնասիրություններ իրականացնելու հանձնարարագրեր տալու, վերահսկվող օբյեկտներից ծառայության գործառույթներին առնչվող տեղեկություններ և փաստաթղթեր պահանջելու լիազորություններ, խմբային շահերից ելնելով, իր պաշտոնեական դիրքն օգտագործել է ծառայության շահերին հակառակ, ինչպես նաև չի կատարել իր ծառայողական պարտականությունները: Սանասարյանը բազմիցս հայտարարել է, որ չի ընդունում մեղադրանքը, և որ իր նկատմամբ հաշվեհարդար է իրականացվում։ Դատարանում քննվող գործով մեղադրյալ են եղել նաև ՊՎԾ գնումների գործընթացների վերահսկողության վարչության պետի ժամանակավոր պաշտոնակատար Սամվել Ադյանը, նույն վարչության գլխավոր մասնագետ Գևորգ Խաչատրյանը և «Զորաշեն» ՍՊԸ-ի փաստացի կառավարումն իրականացնող Տարոն Ավետիսյանը, սակայն նրանց նկատմամբ քրեական հետապնդումը դատաքննության ընթացքում դադարեցվել է՝ քրեական պատասխանատվության ենթարկելու վաղեմության ժամկետն անցած լինելու, այսինքն՝ ոչ արդարացնող հիմքով: 

Արաքս Մամուլյան