Թուրքիայում ուսուցիչները բողոքի ցույցեր են անցկացրել դպրոցներում զինված հարձակումներից հետո

Հազարավոր ուսուցիչներ Թուրքիայում բողոքի ցույցեր են անցկացրել այն բանից հետո, երբ երկու օրվա ընթացքում դպրոցներում զինված հարձակումները ցնցել են երկիրը։ Իշխանությունները խստացրել են սոցցանցերի վերահսկողությունը։ Մինչ այդ, բազմաթիվ մարդիկ հավաքվել են երկրորդ միջադեպի զոհերի հուղարկավորությանը, գրում է Turkish Minute-ը։

Անկարայում մոտ 3500 ուսուցիչ է հավաքվել բողոքի ակցիայի՝ կոչ անելով կրթության նախարարին հրաժարական տալ։

Իշխանությունները հայտարարել են, որ երկրորդ միջադեպի հեղինակը՝ նախկին ոստիկանի որդին, նախապես պլանավորել է իր հարձակումը։ Նրա համակարգչում հայտնաբերված փաստաթղթերը ցույց են տալիս, որ նա «մտադրվել է մոտ ապագայում խոշոր գործողություն իրականացնել»։ Ոստիկանությունը հայտնել է, որ նրա հայրն ու մայրը ձերբակալվել են։

Ոստիկանությունը հայտնել է, որ 14-ամյա հարձակվողը իր WhatsApp-ի էջում լուսանկարում հղում է կատարել Միացյալ Նահանգներում զանգվածային կրակոցներ կատարած անձին։

«Հետաքննության նախնական արդյունքները ցույց են տվել, որ հանցագործն իր WhatsApp էջում օգտագործել է լուսանկար, որը հղում է կատարում Էլիոթ Ռոջերին, որը 2014 թվականին հարձակում է իրականացրել Միացյալ Նահանգներում»,- ասվում է ոստիկանության հայտարարության մեջ։

Ռոջերը վեց անձի էր սպանել Քալիֆորնիա նահանգի Սանտա Բարբարայի համալսարանի տարածքում, այնուհետև ինքնասպան եղել։

Նախնական տեղեկությունների համաձայն՝ չորեքշաբթի դպրոցում կրակոցների և ահաբեկչության միջև որևէ կապ չի հաստատվել։

Թարգմանությունը՝ Էմմա Չոբանյանի