Պակիստանը պահպանում է Իրանի և ԱՄՆ-ի միջև հաղորդակցության «բաց ուղիները»՝ հրադադարի ռեժիմը երկարաձգելու ջանքերի ֆոնին

Պակիստանի պաշտոնյաները պահպանում են «հաղորդակցության բաց ուղիները» ԱՄՆ-ի և Իրանի միջև։ Այս մասին  հայտարարել է Պակիստանի արտաքին գործերի նախարարության խոսնակ Թահիր Անդրաբին, գրում է CNN-ը։

«Աջակցելով լարվածության թուլացմանը, հրադադարի ջանքերին և Միացյալ Նահանգների ու Իրանի միջև կայունության ավելի լայն հետապնդմանը՝ Իսլամաբադը ձգտել է խրախուսել երկխոսությունը, նպաստել հաղորդագրությունների փոխանակմանը՝ նպաստելով բարենպաստ և իմաստալից բանակցությունների համար պայմանների և տարածքի ստեղծմանը»,- Իսլամաբադում լրագրողներին ասել է Անդրաբին։

Պակիստանը հակամարտության կողմերի միջև առանցքային միջնորդն է և պնդում է Թեհրանի ու Վաշինգտոնի միջև բանակցությունների երկրորդ փուլի անցկացման հարցում՝ հրադադարի երկշաբաթյա համաձայնագիրը երկարաձգելու և բռնությունը վերջնականապես դադարեցնելու համար, որի հետևանքով զոհվել են հազարավոր մարդիկ, հազարավորներն էլ տեղահանվել են իրենց տներից։

Անդրաբին ասել է, որ Թեհրանի միջուկային ծրագիրը քննարկվող հարցերի շարքում է, միաժամանակ, հավելել, որ հետագա բանակցությունների ժամկետներ դեռևս որոշված ​​չեն։

Չորեքշաբթի Պակիստանի վարչապետ Շեհբազ Շարիֆը քառօրյա այցով մեկնել է Սաուդյան Արաբիա, Կատար և Թուրքիա՝ այն բանից հետո, երբ Վաշինգտոնի և Թեհրանի միջև բանակցությունները չհանգեցրին համաձայնության: Նույն օրը Պակիստանի բանակի հրամանատարը ժամանել է Թեհրան՝ Իրանին և ԱՄՆ-ին կրկին բանակցային սեղանի շուրջ բերելու քննարկումների համար։

Շարիֆը նաև զրուցել է Կատարի, Իտալիայի, Մեծ Բրիտանիայի և Գերմանիայի առաջնորդների հետ՝ «աշխարհի տարբեր երկրների իր գործընկերների հետ ինտենսիվ դիվանագիտական ​​​​փոխանակումների» շրջանակներում, ասում է  Անդրաբին։

ԱՄՆ նախագահ Դոնալդ Թրամփը երեքշաբթի խոսել էր  հետագա բանակցությունների հնարավորության մասին՝ The New York Post-ին ասելով, որ առաջիկա օրերին Պակիստանում «ինչ-որ բան կարող է տեղի ունենալ»՝ առանց կոնկրետ ամսաթիվ նշելու։

Թարգմանությունը՝ Էմմա Չոբանյանի