Մայիսի 3–5-ը Հայաստանում սահմանափակվում են ընդհանուր նշանակության ավիացիոն թռիչքները. Քաղացիացիայի կոմիտեի պարզաբանումը

ՀՀ օդային տարածքում 2026 թվականի մայիսի 3-ից 5-ը ժամանակավորապես կդադարեցվեն ընդհանուր նշանակության ավիացիայի թռիչքները՝ անվտանգության նկատառումներով։ Սահմանափակումը չի վերաբերում առևտրային և արտակարգ թռիչքներին և պայմանավորված է Հայաստանում նախատեսվող լայնամասշտաբ միջազգային միջոցառումներով։ Այս մասին տեղեկացնում են Քաղաքացիական ավիացիայի կոմիտեից։

«2026 թվականի մայիսի 3-ից մայիսի 5-ը ՀՀ օդային տարածքում արգելվում է ՄԻԱՅՆ ԸՆԴՀԱՆՈՒՐ ՆՇԱՆԱԿՈՒԹՅԱՆ ԱՎԻԱՑԻԱՅԻ թռիչքների իրականացումը, մասնավորապես․
• ոչ առևտրային գործարարական թռիչքները,
• ուսումնական թռիչքները,
• անձնական թռիչքները,
• գյուղատնտեսական, շինարարական, հետազոտական, նկարահանման, ուսումնասիրության, գովազդային և այլ հատուկ բնույթի ծառայությունների համար թռիչքները,
• անօդաչու օդանավերով (դրոններով) ցանկացած բնույթի թռիչքները
Վերոհիշյալ արգելքը որևէ առնչություն չունի առևտրային (կոմերցիոն) կանոնավոր և ոչ կանոնավոր թռիչքների, ինչպես նաև արտակարգ իրավիճակներում իրականացվող թռիչքների հետ և կապված է ՄԻԱՅՆ նշված ժամանակահատվածում Հայաստանի Հանրապետությունում կայանալիք օտարերկրյա մեծաթիվ պատվիրակությունների մասնակցությամբ լայնամասշտաբ միջոցառումների հետ՝ ելնելով անվտանգության նկատառումներից։

Խնդրում և հորդորում ենք զերծ մնալ ապատեղեկատվություն տարածելուց, հետևել ՄԻԱՅՆ Քաղաքացիական ավիացիայի կոմիտեի ֆեյսբուքյան պաշտոնական էջի հրապարակումներին»,- ասվում է հաղորդագրությունում։