26.06.2026 | 02:03
ԱԱ-2026. Գերմանիան անակնկալ պարտություն կրեց, Կոտ դ’Իվուարը հաղթեց. ՏԵՍԱՆՅՈՒԹ
Վիզաների ազատականացումը շատ իրատեսական է․ Արփինե Սարգսյան․ ՏԵՍԱՆՅՈՒԹ
Քաղաքականություն
15.04.2026 | 14:56
Ներքին գործերի նախարարի տեղակալ Արփինե Սարգսյանը, անդրադառնալով ԵՄ-ի հետ վիզաների ազատականացման երկխոսությանը, ընդգծել է, որ գործընթացը ոչ միայն տեխնիկական, այլև գաղափարական նշանակություն ունի Հայաստանի համար։ Նրա խոսքով՝ այս գործողությունների ծրագիրը լիարժեքորեն համընկնում է երկրի ռեֆորմային օրակարգի հետ։
«Վիզաների ազատականացումը ժողովրդավարության ամրապնդման և ինստիտուտների դիմակայունության բարձրացման մասին է։ Կառավարության կողմից ձեռնարկված քայլերը պատշաճ ժամկետում իրականացվելու պայմաններում այս գործընթացը շատ իրատեսական է։ Մենք ունենք քաղաքական կամք՝ այն հանգուցալուծելու ճիշտ տրամաբանության մեջ»,- ԵՄ-Հայաստան քաղհասարակության 8-րդ հանդիպման ընթացքում ասաց Սարգսյանը։
Խոսելով քաղաքացիական հասարակության դերի մասին՝ փոխնախարարը նշեց, որ ակնկալում է գործընկերների աջակցությունը հատկապես հանրային իրազեկման և մոնիթորինգի հարցերում․ «Մենք քաղհասարակության կայուն օժանդակության կարիքն ունենք հատկապես սպասումների կառավարման և իրազեկման բարձրացման տեսանկյունից։ Կարևոր է անօրինական միգրացիոն հոսքերի կանխումը, քանի որ հանրային խոսույթում երբեմն սխալ ընկալում կա, թե ազատականացումը բացարձակ անարգել տեղաշարժ է՝ առանց կանոնների պահպանման»։
Արփինե Սարգսյանը նաև մանրամասնել է, որ գործողությունների ծրագիրը ներառում է լայնածավալ բարեփոխումներ մի շարք առանցքային ոլորտներում. «Ծրագիրն անդրադառնում է մարդու իրավունքներին, միգրացիոն կառավարմանը, կոռուպցիայի և կազմակերպված հանցավորության դեմ պայքարին, ինչպես նաև անձնական տվյալների պաշտպանությանը։ Այս միջոցառումների իրականացումը նոր նշաձող է սահմանելու Հայաստանի համար։ Սա միայն ճամփորդության դյուրացում չէ, սա ճամփորդության ժողովրդավարացում է»։
Մանրամասները՝ տեսանյութում։
