Գիտենք, թե ինչ պետք է անի մեր պետությունը, որ համապատասխանենք ՍԵՊԱ-ի համաձայնագրին․ Սրբուհի Գալյան․ ՏԵՍԱՆՅՈՒԹ

«Գիտենք, թե ինչ պետք է անի մեր պետությունը, որ համապատասխանենք ՍԵՊԱ-ի համաձայնագրին»,- Հայաստան-Եվրոպական միություն քաղաքացիական հասարակության պլատֆորմի 8-րդ հանդիպմանն ասաց արդարադատության նախարար Սրբուհի Գալյանը։

«Խնդիրները, որոնք բարձրաձայնվում են քաղհասարակության ներկայացուցիչների կողմից, որպես կանոն, տեսանելի են մեզ համար, և մենք, իրոք, գործնական քայլեր ենք անում դրանք հաղթահարելու համար։ Մեր գրանցած արդյունքը թույլ է տալիս խոսել այն մասին, որ մենք և քաղհասարակությունը կանգնած ենք ոչ թե իրար մեջք մեջքի տված և նայում ենք տարբեր կողմեր, այլ կանգնած ենք իրար կողք և նայում ենք նույն ուղղությամբ»,- ասաց Գալյանը՝ շնորհակալություն հայտնելով քաղհասարակության ներկայացուցիչներին։

Խոսելով ԵՄ-Հայաստան Համապարփակ և ընդլայնված գործընկերության համաձայնագրի (CEPA) գործիքակազմի և մոնիթորինգի մասին՝ նախարարն ընդգծեց. «Մենք հիմա աշխատում ենք մոնիթորինգի համապատասխան պլատֆորմ ստեղծելու ուղղությամբ, որպեսզի բոլորը, այդ թվում քաղհասարակության ներկայացուցիչները, կարողանան պատկերացում կազմել, թե որ միջոցառումը կատարման որ փուլում է գտնվում։ Օրինակ՝ ինչ դիրեկտիվ է մոտարկվել, որոնք չեն մոտարկվել կամ ինչ նախագիծ է ընդունվել։ Մոնիթորինգի այս գործիքը հնարավորություն է տալու պետական մարմիններին շատ ավելի ուշադիր լինել և գործել ավելի արագ ու արդյունավետ»։

Անդրադառնալով արդարադատության համակարգի թվայնացմանը և նախատեսվող նորամուծություններին՝ Գալյանը հավելեց.
«Արդեն մեր երկրում երկու դատավարություններ թվայնացված են՝ քաղաքացիականը և վարչականը։ Հաջորդ գործիքները պետք է լինեն սնանկության էլեկտրոնային թվային գործիքը և քրեական դատավարության թվայնացումը։ Մենք նաև պատասխանատու կերպով աշխատում ենք տեխնիկական թիմի հետ՝ գործերի ավտոմատ մակագրման խնդիրը լուծելու համար, և հույս ունեմ՝ առաջիկա ամիսների ընթացքում լուծումը հայտնաբերվելուն պես կկարգավորենք նաև այդ հարցը»։

Մանրամասները՝ տեսանյութում։