ԱՄՆ-ը վերականգնել է ռուսական նավթի դեմ պատժամիջոցները, որոնք մեղմացվել էին Իրանի հետ պատերազմի պատճառով

Ռուսական նավթի նկատմամբ ԱՄՆ-ի սահմանած պատժամիջոցները կրկին վերականգնվել են՝ ԱՄՆ Ֆինանսների նախարարության 30-օրյա արտոնագրի ժամկետը լրանալուց հետո, որը տրվել էր մարտի կեսերին, հաղորդում է Politico-ն, փոխանցում է Meduza-ն:

Ֆինանսների նախարարությունը հրաժարվել է մեկնաբանությունից՝ վկայակոչելով նախարար Սքոթ Բեսենթի մարտի հայտարարությանը, որը պատժամիջոցների մեղմացումն անվանել էր «նեղ ուղղվածության և կարճաժամկետ» միջոցառում։

Politico-ն նշում է, որ ապրիլի 10-ին ԱՄՆ երեք սենատորներ՝ դեմոկրատական ​​փոքրամասնության առաջնորդ Չաք Շումերը, Ջին Շահինը և Էլիզաբեթ Ուորենը, կոչ են արել Դոնալդ Թրամփի վարչակազմին չերկարաձգել Ֆինանսների նախարարության լիցենզիան՝ պնդելով, որ դա թույլ է տվել «Ռուսաստանին և նրա հանցակիցներին» ավելի քան 4 միլիարդ դոլար վաստակել։

Ըստ ԱՄՆ պետքարտուղարի՝ Եվրոպայի հարցերով նախկին օգնական Դանիել Ֆրիդի, որը ծառայել է երկու կուսակցությունների վարչակազմերի օրոք, «Ռուսաստանին հանգիստ տալը հիմարություն» էր։

Ուկրաինան աջակցել է ռուսական նավթի դեմ պատժամիջոցների մեղմացումը չերկարաձգելու որոշմանը:

«Ռուսաստանի նավթից և գազից ստացված եկամուտների կրճատումը խաղաղության ջանքերն առաջ մղելու առանցքային գործիք է»,- ասել է Ուկրաինայի նախագահի պատժամիջոցների քաղաքականության հարցերով հանձնակատար Վլադիսլավ Վլասյուկը:

Մարտի 13-ին՝ Մերձավոր Արևելքում պատերազմի սկսվելուց, Իրանի կողմից Հորմուզի նեղուցի շրջափակումից և համաշխարհային շուկաներում էներգակիրների գների կտրուկ աճից երկու շաբաթ անց, Միացյալ Նահանգները մեղմացրեց պատժամիջոցները և թույլատրեց ռուսական նավթի ու նավթամթերքի ներմուծումը ծովում գտնվող նավերով 30 օրով։ Այս մեղմացնող միջոցառումները վերաբերում էին նաև իրանական նավթին։ ԱՄՆ ֆինանսների նախարար Սքոթ Բեսենթը պնդում էր, թե պատժամիջոցների մեղմացումից Մոսկվան կստանա ոչ ավելի, քան 2 միլիարդ դոլար լրացուցիչ եկամուտ, որը նա նկարագրում էր որպես ընդամենը մեկ օրվա բյուջեի եկամուտ։

30-օրյա ժամկետի լրանալուց կարճ ժամանակ առաջ Semafor-ը, հղում անելով ԱՄՆ Ֆինանսների նախարարության և Պետքարտուղարության մի քանի նախկին պաշտոնյաների, հաղորդել էր, որ Վաշինգտոնը շուտով կհայտարարի ռուսական նավթի մատակարարման թույլտվության երկարաձգման մասին: Այս ընթացքում ԱՄՆ-ն և Իրանը բանակցություններ են սկսել. առաջին փուլը տեղի է ունեցել ապրիլի 11-12-ին Իսլամաբադում, սակայն կողմերը դեռևս համաձայնության չեն եկել:

Թարգմանությունը՝ Էմմա Չոբանյանի