15.04.2026 | 12:06
Վահագն Ալեքսանյանի ճեպազրույցը՝ ՈՒՂԻՂ
Թրամփը չի մտածում Իրանի հետ հրադադարի երկարաձգման մասին․ նա հայտարարել է՝ պատերազմը մոտ է ավարտին
Քաղաքականություն
15.04.2026 | 10:57
ԱՄՆ նախագահ Դոնալդ Թրամփն ABC News-ի լրագրող Ջոնաթան Կարլի հետ զրույցում հայտարարել է, որ չի մտածում Իրանի հետ հրադադարի երկարաձգման մասին։
«Այն կարող է ավարտվել տարբեր ձևերով, բայց կարծում եմ, որ գործարքը նախընտրելի է, քանի որ այդ դեպքում նրանք կարող են վերակառուցվել»,- լրագրողին ասել է Թրամփը։
Fox News-ին տված առանձին հարցազրույցում Թրամփը հայտարարել է, որ հակամարտությունը մոտենում է ավարտին։ Սպիտակ տան ղեկավարը, մասնավորապես, ասել է, որ Իրանի պատերազմը համարում է «շատ մոտ ավարտին»։
«Կարծում եմ՝ այն մոտ է ավարտին։ Ես այն համարում եմ շատ մոտ ավարտին»,- ասել է Թրամփը։
Նա բազմիցս հայտարարել է հաղթանակի մասին և կանխատեսել պատերազմի ավարտը՝ փետրվարի վերջին դրա սկսվելուց ընդամենը մի քանի օր անց, սակայն մարտերը շարունակվել են։
«Կտեսնենք, թե ինչ կլինի։ Կարծում եմ՝ [Իրանը] շատ է ուզում գործարք կնքել»,- ասել է Թրամփը։
Ավելի վաղ Թրամփը խոսել էր Իրանի հետ հետագա բանակցությունների հեռանկարի մասին, այն բանից հետո, երբ անցյալ շաբաթավերջին Իսլամաբադում կայացած բանակցությունները չհանգեցրին համաձայնության։ ԱՄՆ նախագահը The New York Post-ին ասել էր, որ Պակիստանում «ինչ-որ բան կարող է տեղի ունենալ առաջիկա երկու օրերի ընթացքում»։
Իրանի պատերազմում երկշաբաթյա հրադադարի ժամկետը լրանում է ապրիլի 22-ին: ԱՄՆ-Իրան բանակցությունների առաջին փուլը, որն ավարտվեց Պակիստանի մայրաքաղաքում ապրիլի 12-ին, էական արդյունքներ չի տվել: ԱՄՆ-ը հաղորդել էր, որ Իրանը չի կարողացել տրամադրել միջուկային զենքից հրաժարվելու հստակ երաշխիքներ: Թեհրանը, իր հերթին, Վաշինգտոնին մեղադրել է «անընդունելի պահանջներ» ներկայացնելու մեջ:
Թարգմանությունը՝ Էմմա Չոբանյանի
