Քաղաքականություն
14.04.2026 | 21:35
Թուրքիայի նախագահ Ռեջեփ Թայիփ Էրդողանը հեռախոսազրույց է ունեցել Հունգարիայի ապագա վարչապետ Պետեր Մագյարի հետ՝ շնորհավորելով նրան ընտրություններում տարած հաղթանակի կապակցությամբ և վստահություն հայտնելով, որ Թուրքիայի և Հունգարիայի համագործակցությունը նոր շրջանում ավելի կզարգանա։ Թուրքիայի նախագահականի հաղորդմամբ՝ զրուցակիցները քննարկել են Թուրքիա-Հունգարիա երկկողմ հարաբերությունների ապագան, ինչպես նաև տարածաշրջանային և համաշխարհային հարցեր։
«Նշելով, որ Թուրքիա-Հունգարիա հարաբերություններն ամրանում են ընդհանուր պատմությամբ և մշակույթով, նախագահ Էրդողանը համոզմունք հայտնեց, որ նոր շրջանում երկու երկրները կընդլայնեն իրենց համագործակցությունը՝ թե՛ երկկողմ մակարդակով, թե՛ միջազգային հարթակներում»,- ասվում է հաղորդագրությունում։
Ընդգծելով Թուրքիայի և Հունգարիայի միջև ռազմավարական համագործակցության ամրապնդման ցանկությունը՝ Էրդողանը նշել է, որ ՆԱՏՕ-ում երկու երկրների դաշինքը նպաստում է տարածաշրջանային և համաշխարհային խաղաղությանը։
Ուշագրավ է, որ Հունգարիայի գործող վարչապետ Վիկտոր Օրբանի հետ սերտ կապեր ունեցող Ադրբեջանի նախագահ Իլհամ Ալիևը դեռևս չի արձագանքել ընտրությունների արդյունքներին։
Նախօրերին Մագյարին շնորհավորվել են նաև ՀՀ վարչապետ Նիկոլ Փաշինյանը և Վրաստանի վարչապետ Իրակլի Կոբախիձեն։
Թարգմանությունը՝ Էմմա Չոբանյանի
