26.06.2026 | 08:14
ԱԱ-2026. ԱՄՆ-ը պարտվեց գոլառատ խաղում, Ավստրալիան փլեյ-օֆֆում է. ՏԵՍԱՆՅՈՒԹ
Արգենտինայում նոր դատավարություն է սկսվել Դիեգո Մարադոնայի մահվան գործով
14.04.2026 | 19:51
Արգենտինայում նոր դատավարություն է սկսվել 1986թ․ ֆուտբոլի աշխարհի չեմպիոն Դիեգո Մարադոնայի մահվան գործով: Արգենտինացի լեգենդար ֆուտբոլիստին խնամող բժշկական թիմի 7 անդամներ մեղադրվել են անզգուշությամբ սպանության մեջ, հաղորդում է Reuters-ը:
Դիեգո Մարադոնան 2020 թվականի նոյեմբերի 25-ին մահացել էր 60 տարեկանում՝ սրտի կանգի հետևանքով։ Այդ ժամանակ նա վերականգնվում էր ուղեղային արյունազեղման վիրահատությունից հետո։
2021 թվականին դատախազությունը նշանակել էր բժշկական հանձնաժողով՝ Մարադոնայի մահվան հանգամանքները հետաքննելու համար։ Այն պարզեց, որ բժշկական անձնակազմը գործել է անպատշաճ, անգործունակ և անզգուշորեն, և որ այն տունը, որտեղ լեգենդար ֆուտբոլիստն ապաքինվել է վիրահատությունից հետո, չի համապատասխանել խնամքի համար անհրաժեշտ պայմաններին։
2025 թվականի մարտին մեկնարկած առաջին դատավարությունը դադարեցվել էր երկու ամիս անց, երբ երեք դատավորներից մեկը հրաժարական էր տվել դատական էթիկայի խախտման պատճառով։ Դատավարության ընթացքում բժիշկների պաշտպանությունը պնդում էր, որ Մարադոնայի մահն անխուսափելի էր երկարատև առողջական խնդիրների պատճառով։ Արգենտինացին տասնամյակներ շարունակ պայքարել էր կոկաինի և ալկոհոլի կախվածության դեմ։
Եթե մեղադրյալները մեղավոր ճանաչվեն, նրանց սպառնում է 8-ից մինչև 25 տարվա ազատազրկում։
