17.08.2026 | 15:44
ՌԴ-ում քրգործ է հարուցվել «Դոժդ»-ի հիմնադիր Նատալյա Սինդեևայի դեմ՝ «անցանկալի» կազմակերպություն հիմնելու համար
Ռուսական հարվածի հետևանքով Դնեպրում 5 մարդ է զոհվել
Քաղաքականություն
14.04.2026 | 17:04
Ուկրաինայի Դնեպր քաղաքի վրա ռուսական հարվածի հետևանքով հինգ մարդ է զոհվել։ Այս մասին հայտնել է Դնեպրոպետրովսկի մարզային վարչակազմի ղեկավար Ալեքսանդր Գանժան։ Նրա խոսքով՝ վիրավորվել է 25 մարդ, որոնցից 10-ը հոսպիտալացվել է ծանր վիճակում, գրում է Current time-ը։
Հարվածի ճշգրիտ վայրը չի հաղորդվել։ Հրապարակված լուսանկարների համաձայն՝ հարձակման հետևանքով վնասվել են սրճարան և մթերային խանութ։
Ուկրաինայի ռազմաօդային ուժերն ավելի վաղ զգուշացրել էին Դնեպրի վրա հրթիռային հարվածի սպառնալիքի մասին, սակայն դեռևս չի հայտարարվել՝ հարվածը հասցվել է հրթիռների՞, թե՞ անօդաչու թռչող սարքերի միջոցով։ Հաղորդվել է հրդեհի մասին։
Այսօր ավելի վաղ ռուսական զորքերն անօդաչու թռչող սարքերի միջոցով հարձակվել էին Խերսոնի հիվանդանոցի վրա։ Վիրավորվել էր հինգ մարդ, այդ թվում՝ չորս բուժաշխատող։ Չեռնիգովում էլ երկու մարդ վիրավորվել է վարչական շենքերի վրա ռուսական անօդաչու թռչող սարքերի հարձակումից հետո։ Հարվածներ են հասցվել նաև Կրիվոյ Ռոգին։
Ընդհանուր առմամբ, վերջին 24 ժամվա ընթացքում Ուկրաինայում ռուսական հարվածների հետևանքով վիրավորվել է ավելի քան 20 մարդ։
«Ուկրէներգո»-ն հայտնում է, որ լայնածավալ հարվածների պատճառով Դնեպրոպետրովսկի, Զապորոժիեի, Խարկովի, Օդեսայի, Նիկոլաևի և Խերսոնի մարզերի որոշ սպառողներ մնացել են առանց էլեկտրաէներգիայի։
Թարգմանությունը՝ Էմմա Չոբանյանի
