Իտալիայի վարչապետը հայտարարել է Իսրայելի հետ պաշտպանական համաձայնագրի դադարեցման մասին

Իտալիան կասեցրել է Իսրայելի հետ պաշտպանական համաձայնագիրը, որը ենթադրում է ռազմական տեխնիկայի և տեխնոլոգիական հետազոտությունների փոխանակում։ Այս մասին հայտարարել են վարչապետ Ջորջիա Մելոնին և դիվանագիտական ​​աղբյուրները, գրում է Le Monde-ը։

«Հաշվի առնելով ստեղծված իրավիճակը՝ կառավարությունը որոշել է կասեցնել Իսրայելի հետ պաշտպանական համաձայնագրի ավտոմատ երկարաձգումը»,- ասել է Մելոնին Վերոնայում կայացած միջոցառման ժամանակ, հաղորդում են իտալական ANSA և AGI լրատվական գործակալությունները։

Իսրայելի կողմից 2006 թվականին հաստատված համաձայնագիրը վերանայվում է յուրաքանչյուր հինգ տարին մեկ անգամ։ Այն նախատեսում է համագործակցություն պաշտպանական արդյունաբերության, զինվորական անձնակազմի կրթության և վերապատրաստման, հետազոտությունների և զարգացման, տեղեկատվական տեխնոլոգիաների ոլորտներում։

Վերջին շաբաթվա ընթացքում երկու երկրների միջև լարվածությունը սրվել է, երբ Իտալիայի կառավարությունը մեղադրել է իսրայելական ուժերին Լիբանանում գտնվող ՄԱԿ-ի իտալացի խաղաղապահների շարասյան վրա նախազգուշական կրակոցներ արձակելու մեջ: Իտալիան կանչել է Իսրայելի դեսպանին՝ բողոքելով միջադեպի կապակցությամբ, որի հետևանքով վնասվել է առնվազն մեկ մեքենա, սակայն վիրավորներ չկան։

Երկուշաբթի Իսրայելը կանչել է Իտալիայի դեսպանին՝ այդ երկրի արտաքին գործերի նախարար Անտոնիո Տայանիի մեկնաբանություններից հետո, որը դատապարտել է իսրայելական ուժերի կողմից լիբանանցի քաղաքացիական անձանց վրա «անընդունելի հարձակումները»։

Տայանին երկուշաբթի Բեյրութում էր՝ Լիբանանի նախագահ Ժոզեֆ Աունի և արտգործնախարար Յուսեֆ Ռագգիի հետ բանակցություններ վարելու համար: Ավելի ուշ նա X-ում գրել է, որ այնտեղ է «Իտալիայի համերաշխությունը փոխանցելու համար՝ Իսրայելի կողմից քաղաքացիական բնակչության դեմ անընդունելի հարձակումներից հետո»:

Թարգմանությունը՝ Էմմա Չոբանյանի