Զելենսկին ժամանել է Բեռլին՝ Մերցի հետ բանակցությունների

Ուկրաինայի նախագահ Վլադիմիր Զելենսկին ժամանել է Բեռլին՝ մասնակցելու գերմանա-ուկրաինական միջկառավարական խորհրդակցություններին և Գերմանիայի կանցլեր Ֆրիդրիխ Մերցի հետ հանդիպմանը, գրում է DW-ն։

Ուկրաինական պատվիրակության կազմում են նաև Ուկրաինայի կաբինետի մի քանի անդամներ։ Խորհրդակցությունները կկենտրոնանան Ուկրաինային ֆինանսական և ռազմական աջակցության, ինչպես նաև երկրի վերականգնման և ուկրաինացի փախստականների վերադարձի հարցերի վրա։ DW-ի թղթակցի հաղորդմամբ՝ երիտասարդ ուկրաինացի տղամարդկանց ճակատագիրը մնում է բանակցությունների զգայուն թեմա։

Կողմերը, ինչպես սպասվում է, մի քանի համաձայնագրեր կստորագրեն։ Խորհրդակցություններից հետո Մերցը և Զելենսկին համատեղ մամուլի ասուլիս կանցկացնեն։

Այս բանակցությունները երկու տասնամյակի ընթացքում գերմանա-ուկրաինական կառավարության առաջին լիարժեք խորհրդակցություններն են։ Կանցլեր Ֆրիդրիխ Մերցը շեշտում է, որ Ուկրաինան, որը 2022 թվականից ի վեր Ռուսաստանի կողմից լայնածավալ ներխուժման է ենթարկվել, մնում է Գերմանիայի արտաքին քաղաքականության գերակա խնդիրը։

Գերմանիան դարձել է Ուկրաինայի ամենամեծ աջակիցը այն բանից հետո, երբ Թրամփի վարչակազմի օրոք Միացյալ Նահանգներն անցյալ տարի դադարեցրեց աջակցությունը։ Որպես հաջորդ քայլ՝ Բեռլինը ձգտում է բացել ԵՄ-ի կողմից Ուկրաինայի համար նախատեսված 90 միլիարդ եվրոյի վարկային գիծը։ Դա կարող է տեղի ունենալ արդեն մայիսի կեսերին, երբ Հունգարիայի նոր ԵՄ-ի բարեկամ կառավարությունը դադարեցնի հետագա վճարումների նկատմամբ իր դիմադրությունը։

Ռուսաստանի կողմից Ուկրաինայի դեմ լայնածավալ պատերազմի սկսվելուց ի վեր Գերմանիան Կիևին տրամադրել է 55 միլիարդ եվրո (64 միլիարդ դոլար) ռազմական օգնություն՝ ավելին, քան որևէ այլ եվրոպական երկիր, հաղորդում է Reuters-ը: Գերմանիայի 2026 թվականի բյուջեով Ուկրաինային օգնություն տրամադրելու համար նախատեսված է 11,5 միլիարդ եվրո։

Հաղորդվում է, որ Ուկրաինայի նախագահը Գերմանիայից կմեկնի Նորվեգիա։ Օսլոյում նախատեսվում է նրա հանդիպումը վարչապետ Յոնաս Գահր Ստյորեի հետ։

Թարգմանությունը՝ Էմմա Չոբանյանի