Վենսը մանրամասներ է հայտնել Պակիստանում Իրանի հետ անցկացված բանակցություններից

Իրանի դեմ ԱՄՆ-Իսրայել պատերազմի հետագա ընթացքը կախված է Թեհրանից։ Fox News-ին տված հարցազրույցում այս մասին հայտարարել է ԱՄՆ փոխնախագահ Ջեյ Դի  Վենսը, գրում է DW-ի ռուսական ծառայությունը:

Վենսն ապրիլի 11-ին և 12-ին Պակիստանում բանակցություններ էր վարել իրանցի պաշտոնյաների հետ։ Ըստ լրատվամիջոցների հաղորդագրությունների՝ այդ բանակցություններն առաջընթաց չեն արձանագրել։

«Գնդակն ամենաբարձր աստիճանով դաշտի իրենց կեսում է»,- ասել է Վենսը։

Նա հավելել է, որ Պակիստանում բանակցությունները հստակորեն սահմանել են ԱՄՆ-ի առաջնահերթություններն այս հակամարտությունում։ Այս առումով նա հատուկ նշել է Հորմուզի նեղուցի բացումը, որը կարևոր է համաշխարհային նավթային առևտրի համար։

Խոսելով Իսլամաբադում իրանական կողմի հետ բանակցությունների արդյունքների մասին՝ ԱՄՆ փոխնախագահը շեշտել. «Դրանք առաջընթաց գրանցեցին մեր ուղղությամբ, այդ պատճառով կարծում եմ, որ կարող ենք ասել, որ մենք լավ ազդանշաններ ունեինք, բայց դրանք բավականաչափ հեռու չգնացին»։

Ըստ Վենսի՝ Պակիստանում բանակցություններն ավարտվել են, քանի որ ներգրավված իրանցիները պատրաստ չէին ինքնուրույն գործարք կնքել․ նրանք պետք է վերադառնային Թեհրան՝ պայմանները վերջնական քննարկելու համար։ Նա նաև նշել է, որ ամերիկացիներն ունեն ռազմական առավելություն։

«Մենք շատ խաղաքարտեր ունենք։ Մենք լծակներ ունենք։ Եթե իրանցիները ցանկանան փորձել դիմել տնտեսական ահաբեկչության (Հորմուզի նեղուցով անցնող նավերի համար վճար գանձել), մենք կհետևենք պարզ սկզբունքի. ոչ մի իրանական նավի թույլ չի տրվի լքել նավահանգիստը։ Մենք գիտենք, որ դա շատ կարևոր է նրանց համար: Մենք գիտենք, որ դա ստեղծում է լրացուցիչ տնտեսական լծակներ»,- ասել է ԱՄՆ փոխնախագահը:

Վենսի խոսքով՝ նպատակներից, որոնցից ԱՄՆ-ը չի ցանկանում հրաժարվել, իրանական հարստացված ուրանի նկատմամբ ԱՄՆ-ի վերահսկողությունը և ստուգման մեխանիզմի ստեղծումն է՝ ապահովելու, որ Իրանն ապագայում միջուկային զենք չարտադրի։

Իր հերթին, ԱՄՆ էներգետիկայի նախարար Քրիս Ռայթը ապրիլի 13-ին կանխատեսել էր, որ նավթի գները կշարունակեն աճել ևս մի քանի շաբաթ, մինչև Հորմուզի նեղուցում նավագնացության ծավալը հասնի «նշանակալի» մակարդակի։

Թարգմանությունը՝ Էմմա Չոբանյանի