02.07.2026 | 14:34
770 դրամ ելակի, 275 դրամ լոլիկի և 400 դրամ չերի լոլիկի յուրաքանչյուր կգ-ի արտահանման համար
Մալխաս Ամոյան․ Լավ մարզավիճակում եմ Եվրոպայի առաջնությունից առաջ, կփորձեմ նվաճել 5-րդ ոսկե մեդալը
13.04.2026 | 19:19
Փարիզ-2024 Օլիմպիական խաղերի բրոնզե մեդալակիր, աշխարհի կրկնակի ու Եվրոպայի քառակի չեմպիոն Մալխաս Ամոյանն անդրադարձել է ապրիլի 20-26-ին Ալբանիայի մայրաքաղաք Տիրանայում կայանալիք Եվրոպայի առաջնությանը։
«Անցկացրել ենք լավ հավաքներ, սա արդեն 5-րդն է։ Գտնվում եմ լավ մարզավիճակում, իսկ թե ինչպես եմ պատրաստվել և ինչի եմ արժանի, ցույց կտա մրցագորգը։
Պատասխանատվությունն էլ ավելի է ծանրանում, երբ Եվրոպայի գործող չեմպիոնի կարգավիճակում ես մեկնում մրցավայր։ Բոլորն ավելի տրամադրված ու պատրաստված են գոտեմարտում քեզ հետ, այդ պատճառով գործը դժվարանում է։ Բայց կփորձեմ ամեն ինչ անել, որ 5-րդ ոսկե մեդալը նվաճեմ Եվրոպայի առաջնությունում։ Իմ քաշային կարգում կան 6-7 ուժեղ մրցակիցներ, որոնք հավակնում են հաղթողի կոչմանը։ Ով ավելի լավ մարզավիճակում կլինի ու ավելի լավ կզգա այդ օրը, նա էլ կհասնի հաղթանակի»,- լրագրողների հետ զրույցում նշել է Մալխաս Ամոյանը։
Հիշեցնենք, որ հունահռոմեական ոճի ըմբշամարտի Հայաստանի հավաքականը Եվրոպայի առաջնությանը մասնակցելու է ամբողջական կազմով՝ Մանվել Խաչատրյան (55 կգ), Սուրեն Աղաջանյան (60 կգ), Կարեն Ասլանյան (63 կգ), Սլավիկ Գալստյան (67 կգ), Գասպար Տերտերյան (72 կգ), Մալխաս Ամոյան (77 կգ), Սամվել Գրիգորյան (82 կգ), Գևորգ Թադևոսյան (87 կգ), Հայկ Խլոյան (97 կգ), Ալբերտ Վարդանյան (130 կգ):
