Արմեն Բաբալարյան․ «Արթուր Ալեքսանյանը մեկ ամիս բուժվել է Գերմանիայում, իսկ հիմա գորգի վրա է, մարզվում է»

Հունահռոմեական ոճի ըմբշամարտի Հայաստանի հավաքականը շարունակում է պատրաստվել ապրիլի 20-26-ին Ալբանիայի մայրաքաղաք Տիրանայում կայանալիք Եվրոպայի առաջնությանը: Ապրիլի 13-ին թիմն անցկացրել է բաց մարզում, որի ընթացքում հավաքականի գլխավոր մարզիչ Արմեն Բաբալարյանը խոսել է նախապատրաստական փուլի ու օլիմպիական չեմպիոն Արթուր Ալեքսանյանի շուրջ ստեղծված իրավիճակի մասին:

«Անցել ենք 4 փուլ, մասնակցել ենք երկու միջազգային մրցաշարի ու Եվրոպայի մինչև 23 տարեկանների առաջնությանը: Ամեն ինչ նորմալ է անցել։ Ունենք թեթև վնասվածքներ, սակայն դա մեզ չի կարող խանգարել մրցումային փուլում։ Պատրաստվածությունը նորմալ է։ Մնում է միայն մրցումային փուլում տեսնել, թե ով ինչ կարող է ցուցադրել։

Արթուր Ալեքսանյանին փոխարինելու է Հայկ Խլոյանը, ով իր մարզավիճակի ամենաբարձր մակարդակի վրա է։ Արթուր Ալեքսանյանը մեկ ամիս բուժվել է Գերմանիայում, իսկ հիմա գորգի վրա է, մարզվում է և փորձում բարելավել մարզավիճակը։ Արթուրը հիմա մարզվում է, բայց նաև շարունակում է բուժումները։ Նա բաց է թողնելու միայն այս Եվրոպայի առաջնությունը, մյուս մրցումների մասին խնդրում եմ դեռ չխոսել»,- ասել է մարզիչը։

Հիշեցնենք, որ հունահռոմեական ոճի ըմբշամարտի Հայաստանի հավաքականը Եվրոպայի առաջնությանը մասնակցելու է ամբողջական կազմով՝ Մանվել Խաչատրյան (55 կգ), Սուրեն Աղաջանյան (60 կգ), Կարեն Ասլանյան (63 կգ), Սլավիկ Գալստյան (67 կգ), Գասպար Տերտերյան (72 կգ), Մալխաս Ամոյան (77 կգ), Սամվել Գրիգորյան (82 կգ), Գևորգ Թադևոսյան (87 կգ), Հայկ Խլոյան (97 կգ), Ալբերտ Վարդանյան (130 կգ):