Իսրայելն աջակցում է Թրամփի կողմից Իրանի նավահանգիստների շրջափակմանը. Նեթանյահու

Իրանի և ԱՄՆ-ի միջև հրադադարը «կարող է շատ բան փոխել»։ Այսօր այս մասին հայտարարել է Իսրայելի վարչապետ Բենիամին Նեթանյահուն։ Ըստ նրա՝ ԱՄՆ փոխնախագահ Ջեյ Դի Վենսը Պակիստանում Իրանի հետ բանակցություններից վերադառնալիս խոսել է իր հետ։ Նեթանյահուն ասել է, որ ամերիկացիները «չեն կարող հանդուրժել Իրանի կողմից բանակցությունների մեկնարկի մասին համաձայնագրի ակնհայտ խախտումը»։

«Համաձայնությունն այն էր, որ նրանք կդադարեցնեն կրակը, և իրանցիներն անմիջապես կբացեն [Հորմուզի] նեղուցը, նրանք դա չարեցին։ Ամերիկացիները չէին կարող հաշտվել դրա հետ»,- ասել է նա։

Բացի այդ, ըստ վարչապետի՝ Վենսը Նեթանյահուին ասել է, որ ԱՄՆ տեսանկյունից կենտրոնական հարցը բոլոր հարստացված նյութերի հեռացումն է և այն բանի ապահովումը, որ առաջիկա տարիներին, հնարավոր է՝ տասնամյակներ շարունակ, Իրանի ներսում ուրանի հարստացում չի լինի․ «Սա նրանց ուշադրության կենտրոնում է և, իհարկե, դա կարևոր է նաև մեզ համար»։

Իսրայելն աջակցում է ԱՄՆ նախագահ Դոնալդ Թրամփի՝ իրանական նավահանգիստների վրա ռազմածովային շրջափակում կիրառելու որոշմանը, շեշտել է Նեթանյահուն՝ հավելելով, որ երկու կողմերն էլ «մշտական ​​համակարգման մեջ են»։

«Մեր միջև պառակտման մասին պնդումները բացարձակապես կեղծ են։ Ճիշտ հակառակն է։ Դա կարող է վկայել յուրաքանչյուր ոք, ով ներկա է եղել այս զրույցներին և նախագահի ու նրա թիմի հետ մեր ամենօրյա քննարկումներին։ Այս մակարդակի համակարգում երբեք չի եղել»,- հայտարարել է Բենիամին Նեթանյահուն։

Թարգմանությունը՝ Էմմա Չոբանյանի