«Իսրայելը կարող է փորձել Իրանից հետո Թուրքիան դարձնել իր նոր թշնամին». Ֆիդան

Թուրքիայի արտաքին գործերի նախարար Հաքան Ֆիդանը զգուշացրել է, որ «Իսրայելը կարող է Անկարային դիտարկել որպես իր հաջորդ հակառակորդ՝ Իրանից հետո»։ Նա ասել է, թե Իսրայելի վարչապետ Բենիամին Նեթանյահուն չի կարող իրեն քաղաքականապես պահել առանց թշնամու։ Ֆիդանը այս հայտարարությունն արել է «Անադոլու» գործակալության հետ զրույցում՝ անդրադառնալով Նեթանյահուի կողմից Թուրքիայի նախագահ Ռեջեփ Թայիփ Էրդողանի հասցեին վերջերս հնչեցրած քննադատությանը։

«Նեթանյահուն բարդույթ ունի Էրդողանի դեմ և չի կարողանում ընդունել նրա վարքագիծը։ Թուրքիայի հավասարակշռության ջանքերը տարածաշրջանը պահում են այնպիսի վիճակում, որ Իսրայելը չի ​​կարող Թուրքիային ներքև քաշել։ Այս իրավիճակը նրանց անկայունության է մղում»,- ասել է Ֆիդանը։

Նա նշել է, որ Իսրայելի տարածաշրջանային քաղաքականությունը բազմաթիվ ճակատներում տրամագծորեն հակառակ է Թուրքիայի քաղաքականությանը։

«Երբ դիտարկվում է Սիրիայի, Գազայի և Լիբանանի տեսանկյունից, Իսրայելի կողմից տարածվող ծայրահեղական քաղաքականությունը տրամագծորեն հակառակ է Թուրքիայի քաղաքականությանը։ Ահա թե ինչու նրանք թիրախավորում են Թուրքիան։ Էրդողանի առաջատարությունը համաշխարհային կարգում և Թուրքիայի ազդեցության ոլորտը խոչընդոտում են այն պատրանքը, որն Իսրայելը փորձում է կառուցել»,- ասել է նա։

Ֆիդանը նաև հայտարարել է․ «Իրանից հետո Իսրայելը չի ​​կարողանա ապրել առանց թշնամու։ Մենք տեսնում ենք, որ Նեթանյահուն կարող է ձգտել Թուրքիային նշանակել որպես նոր հակառակորդ»։

Թարգմանությունը՝ Էմմա Չոբանյանի