Շվեդիան ձերբակալել է Ռուսաստանից եկող նավը․ մեղադրում են ծովն աղտոտելու համար

Շվեդիայի առափնյա պահպանության ծառայությունը բարձրացել է Hui Yuan բեռնատար նավի վրա, որը Պանամայի դրոշի տակ շարժվում էր Լենինգրադի մարզի Ուստ-Լուգա նավահանգստից դեպի Իսպանիայի Լաս Պալմաս։ Նավը ձերբակալվել է բնապահպանական օրենսդրության խախտման կասկածանքով։ Շվեդական իշխանությունների պնդմամբ՝ առափնյա պահպանության ինքնաթիռները նկատել են, որ բալկերը տախտակամածից ծով է լվացել ածխի մնացորդներ, հայտնում է The Insider-ը։

Նավի կապիտանը հարցաքննվել է և խոստովանել, որ անզգուշությամբ թափոններ է լցրել ծովը, հայտնել է ավագ դատախազ Հոկան Անդերսոնը։ Իրավապահները մտադիր են կիրառել 50 օրական տուգանք՝ յուրաքանչյուրը 500 կրոն (մոտ 2.7 հազար դոլար)։ Նավը կանգնած է Իստադ քաղաքի ափերի մոտ։

Ավելի վաղ Շվեդիան արդեն ձերբակալել էր Ռուսաստանի հետ կապված նավեր։ Մասնավորապես, այս տարվա գարնանը սկանդինավյան երկրի իշխանությունները ձերբակալել էին Flora 1 «ստվերային նավատորմի» տանկերը՝ Բալթիկ ծովում նավթային արտահոսքի կասկածանքով։ Շուտով այն ազատ է արձակվել․ հետաքննությունը չի հաստատել էկոլոգիական հանցագործության նշանները։ Մինչ այդ ձերբակալվել էին նաև Sea Owl I և Caffa նավերը, որոնք, ենթադրաբար, շարժվում էին կեղծ դրոշի տակ։

Այսօր կանգնեցված Hui Yuan բալկերը Ստոկհոլմը չի կապում ռուսական «ստվերային նավատորմի» հետ, նշել է տեղական SVT պարբերականը։

Նավը կառուցվել է 2004 թվականին, և այդ ժամանակից ի վեր բազմիցս փոխել է անունը ու շարժվել է Պանամայի և Հարավային Կորեայի դրոշների տակ։