Ընտրությունը մեկն է՝ փոփոխություն Սամվել Կարապետյանի հետ կամ վախ հարևաններից Փաշինյանի հետ․ Նարեկ Կարապետյան․ ՏԵՍԱՆՅՈւԹ

«Ուժեղ Հայաստան» կուսակցության անդամ Նարեկ Կարապետյանը Ազատության հրապարակում կուսակցության հրավիրած հանրահավաքի ժամանակ իր ելույթում խոստացավ ստեղծել 300,000 նոր աշխատատեղ, որպեսզի մարդիկ մնան երկրում, իսկ արտագնա աշխատանքի մեկնածները վերադառնան։ Նա նշեց, որ փոփոխություն է պետք երկրում տիրող մթնոլորտում, որտեղ վիրավորանքն ու արժանապատվությունը ոտնահարելը չպետք է սովորական դառնան։

Կարապետյանն ընդգծեց նաև առողջապահության և կրթության ոլորտներում բարեփոխումների անհրաժեշտությունը, նշելով․ «Առողջությունը նախընտրական նվեր չէ, դա պարտք է մեր երկրին, առանց այն էլ քիչ մեր ժողովրդին»։

Որպես օրինակ բերելով Վրաստանը, որտեղ բարձրագույն կրթությունն անվճար է դարձել, նա մտահոգություն հայտնեց, որ 10-15 տարի հետո երկու հասարակությունների միջև մեծ տարբերություն կլինի։

Կարապետյանը քննադատեց գործող իշխանություններին՝ ասելով, որ ութ տարի անց, «երկրի 30 տոկոսը թշնամուն հանձնելուց, աղքատությունը չնվազեցնելուց և ատելության մթնոլորտ սերմանելուց հետո» մի քանի «ռեմոնտ» են անում ու ձայն խնդրում։ Նա կոչ արեց հավատալ, որ Հայաստանը կարող է զարգացած երկիր լինել։

«Ընտրությունը մեկն է՝ փոփոխություն Սամվել Կարապետյանի հետ, թե ներկա ճահիճը, աղքատությունը, իրար հանդեպ անարգանքն ու վախը հարևաններից՝ Փաշինյանի հետ», – հայտարարեց Նարեկ Կարապետյանը՝ եզրափակելով, որ փոփոխությունը հնարավոր է միայն ապագա վարչապետ Սամվել Կարապետյանի հետ։

Մանրամասները՝ տեսանյութում։