11.04.2026 | 18:06
Այստեղ հավաքվել են մարդիկ, ովքեր պահանջում են փոփոխություն․ պետք է կանգնեցնել Փաշինյանին․ Ալեքսան Ալեքսանյան. ՏԵՍԱՆՅՈւԹ
Իրանը չի կարողանում գտնել իր ականները Հորմուզի նեղուցում․ ԱՄՆ
Քաղաքականություն
11.04.2026 | 16:53
Իրանը ի վիճակի չէ հայտնաբերել Հորմուզի նեղուցում տեղադրված բոլոր ականները և չունի դրանք ականազերծելու հնարավորություններ, ուրբաթ՝ ապրիլի 10-ին, այս մասին հայտնել է The New York Times-ը՝ հղում անելով ամերիկացի պաշտոնյաներին։ Պարբերականի զրուցակիցների խոսքով՝ հենց սա է պատճառներից մեկը, որ Թեհրանը չի կարող արագ կատարել Թրամփի վարչակազմի պահանջը՝ ապահովել նեղուցով ազատ անցումը։
NYT-ի աղբյուրների փոխանցմամբ՝ այս խնդիրը, ամենայն հավանականությամբ, կդառնա իրանական և ամերիկյան պատվիրակությունների բանակցությունների առանցքային թեմաներից մեկը, որոնք նախատեսված են ապրիլի 11-ին Պակիստանում։
Թեհրանը նեղուցը ականապատել է փոքր նավակներից մարտին՝ ԱՄՆ-ի և Իսրայելի կողմից Իրանի դեմ պատերազմի սկսվելուց կարճ ժամանակ անց։ Ականները, ինչպես նաև իրանական հրթիռային և դրոնային հարվածների սպառնալիքը, նվազեցրել են նավթատար տանկերների և այլ նավերի հոսքը մինչև նվազագույնի, բարձրացրել համաշխարհային էներգակիրների գները և Իրանի համար ապահովել պատերազմի գլխավոր խաղաքարտը։ Թեհրանը նեղուցում թողել է նեղ միջանցք՝ թույլ տալով անցում այն նավերին, որոնք վճարել են «տուրքը»։
Իսլամական հեղափոխության պահապանների կորպուսը (ԻՀՊԿ) զգուշացրել էր նավերին ականների հետ բախման վտանգի մասին, իսկ իշխանամետ լրատվամիջոցները հրապարակել էին անվտանգ երթուղիների սխեմաներ։ Սակայն այս երթուղիները չափազանց սահմանափակ են նաև այն պատճառով, որ Իրանը նեղուցը ականապատել է անկանոն կերպով, նշել են ամերիկացի պաշտոնյաները։
Անհայտ է՝ արդյոք Իրանը ֆիքսել է յուրաքանչյուր ականի տեղակայման վայրը։ Միաժամանակ որոշ ականներ տեղադրվել են այնպես, որ կարող էին դանդաղ շարժվել և տեղաշարժվել հոսանքների ազդեցությամբ։
