02.07.2026 | 06:06
ԱԱ-2026. ԱՄՆ-ի հավաքականը շարժվում է առաջ. ՏԵՍԱՆՅՈՒԹ
ԵՄ-ում գործարկվել է սահմանների անցման նոր համակարգ՝ առանց անձնագրում կնիքի
10.04.2026 | 23:33
Եվրոպական միությունում լիարժեք գործարկվել է մուտքի և ելքի էլեկտրոնային համակարգը (EES), որը փոխարինում է անձնագրերում կնիք դնելու գործընթացը թվային գրանցմամբ։ Ինչպես հայտնում են Եվրահանձնաժողովից, համակարգը ապրիլի 10-ից սկսած գործում է Շենգենյան գոտու բոլոր 29 երկրների արտաքին սահմաններում։
Նոր համակարգը նախատեսված է ԵՄ անդամ չհանդիսացող երկրների քաղաքացիների համար՝ ներառյալ զբոսաշրջիկները, տարանցիկ ուղևորները։ Այն կիրառվում է օդանավակայաններում, երկաթուղային կայարաններում, ավտոմոբիլային անցակետերում և ծովային նավահանգիստներում։
EES-ը մշակվել է շուրջ 10 տարի և փորձնական ռեժիմով գործել է 2025 թվականի հոկտեմբերի 12-ից։ Փորձարկման վեց ամսվա ընթացքում գրանցվել է ավելի քան 52 միլիոն մուտք ու ելք, իսկ մոտ 27 հազար մարդու մերժվել է մուտքը ԵՄ։ Նրանցից շուրջ 700-ը ճանաչվել են որպես անվտանգության սպառնալիք։
Համակարգում ընդգրկված են ԵՄ բոլոր երկրները, բացառությամբ Իռլանդիայի և Կիպրոսի, ինչպես նաև ԵՄ-ից դուրս գտնվող մի շարք երկրներ՝ Իսլանդիան, Լիխտենշտեյնը, Նորվեգիան և Շվեյցարիան։
Առաջին անգամ սահման անցնելիս ուղևորները պետք է լուսանկարվեն և հանձնեն մատնահետքեր՝ ստեղծելով իրենց թվային պրոֆիլը, որտեղ կներառվեն նաև անձնագրային տվյալները։ Հետագա անցումների ժամանակ տվյալները կհամեմատվեն այդ գրանցման հետ։ Մինչև 12 տարեկան երեխաներից մատնահետքեր չեն պահանջվում։
Գրանցումը կատարվում է հատուկ տերմինալների կամ սահմանային ինքնասպասարկման սարքերի միջոցով, որոնք հասանելի են կենսաչափական անձնագիր ունեցող անձանց համար։
