Ինչ քայլ է անելու ՀԱԿ-ը՝ իշխանության գալու առաջին օրը. Զուրաբյանը մանրամասնեց․ ՏԵՍԱՆՅՈՒԹ

«Իշխանության գալով առաջին հերթին իրականացնելու ենք Հայաստանում սահմանադրական ռեֆորմ, որի նպատակն է լինելու վերադարձը դեպի նախագահական-խորհրդարանական կամ այլ կերպ ձևակերպված կիսանախագահական համակարգը, որը ինքնին կապահովի զսպումների և հակակշիռների համակարգ Հայաստանում»,- այս մասին հրավիրված մամուլի ասուլիսի ժամանակ ասաց Հայ ազգային կոնգրեսի վարչապետի թեկնածու Լևոն Զուրաբյանը։

Քաղաքական գործիչը ներկայացրեց, թե ինչ էր առաջարկում իրենց ուժն աշխատողներին, ուսանողներին և թոշակառուներին։

«Աշխատող մարդկանց համար՝ բիզնես միջավայր, բարելավում և այլն: Ուսանողների համար մենք մտցնելու ենք, ըստ էության, անվճար բարձրագույն կրթություն։ Ինչու եմ ասում «ըստ էության», որովհետև իրականում դա չի լինի լիակատար անվճար ֆինանսավորում: Մենք հանդես ենք գալու պետական ուսանողական բանկի ստեղծման գաղափարով, որը թույլ է տալիս երկարաժամկետ վարկեր տալ բոլոր ուսանողներին, որպեսզի իրենք կարողանան՝ չունենալով այդ գումարները՝ այնուամենայնիվ ստանալ կրթություն, իսկ հետո ապագայում աշխատանքի ընդունվելով, ասենք երկարաժամկետ մի հեռանկարում, ասենք 20 կամ 30 տարվա մեջ այդ վարկը վերադարձնել: Դա լինելու է պետական հովանավորությամբ գործող ուսանողական բանկ:

Ի՞նչ ենք ուզում առաջարկել թոշակառուներին: Ես հենց հիմա ձեզ մի բան եմ ասում: Առաջին օրը, երբ որ մենք գանք իշխանության, մենք անելու ենք հետևյալ քայլը. մենք նախաձեռնելու ենք գործընթաց, բայց պատշաճ օրենսդրական գործընթաց, որով մեր թոշակառուների թոշակները ևս 10,000 դրամով կբարձրանան: Անմիջապես ասում եմ իշխանության գալուց հետո: Ինչո՞ւ եմ ես սրա մասին այսքան վստահ խոսում և ինչու սա չի կարելի համարել պոպուլիստական խոստում, որովհետև մենք տեսել ենք, որ մի ժամանակաշրջանում, երբ միջին աշխատավարձը աճել է 170%-ով, թոշակները աճել են շատ ավելի փոքր տեմպով՝ 120%-ով: Մենք դա անելու ենք պատշաճ բյուջետավորման պրոցեսով, հաշվարկել ենք, դա հնարավոր է, որովհետև թոշակները հիմա ավելի դանդաղ են աճում քան միջին աշխատավարձը, և էդ պրոցեսը կարելի է շրջել՝ դարձնել թոշակի աճը համընթաց միջին աշխատավարձին»,- մանրամասնեց Զուրաբյանը։

Մանրամասները՝ տեսանյութում։