Արման Ծառուկյանը հայտնել է՝ ինչով է զբաղվելու UFC-ից հեռանալուց հետո

UFC-ի թեթև քաշային կարգի դասակարգման երկրորդ համար Արման Ծառուկյանը պատմել է, որ մտադիր է UFC-ից հեռանալուց հետո անցկացնել պրոֆեսիոնալ բռնցքամարտի մենամարտեր։

«Ցանկանում եմ անցկացնել բռնցքամարտի մենամարտ։ Գուցե 5-6 տարի հետո։ Երբ ես հեռանամ UFC-ից, գերազանցելով բոլոր ռեկորդները, ցանկանում եմ անցկացնել բռնցքամարտի 3-4 մենամարտ։ Ջեյք Փոլը նույնն է անում։

UFC-ի նախագահ Դենա Ուայթի հետ ոչ մի խնդիր չոնեմ։ Ամեն բան կարգին է։ UFC-ի ղեկավարները վախենում են, որ ես կվերցնեմ տիտղոսն ու կհեռանամ։ Սակայն ո՞ւր պետք է գնամ։ Ես ցանկանում եմ դառնալ UFC-ի չեմպիոն ու մնալ այն վայրում, որն օգնել է ինձ առաջադիմել ու դառնալ աստղ։

Մտադիր եմ դառնալ չեմպիոն ու ռեկորդներ սահմանել այս դիվիզիոնում։ Ցանկանում եմ տիտղոսը պաշտպանել այնքան, որքան հնարավոր է։ Իսլամ Մախաչևը դա արել է 4 անգամ, իսկ ես կանեմ 5 կամ 6 անգամ։ Ես նույնպես արդեն երիտասարդ չեմ։ Ինձ 6-7 տարի է մնացել սպորտում։ Ցանկանում եմ շատ գումար վաստակել, դառնալ չեմպիոն, լինել աշխարհի լավագույն մարտիկը ու հետո նոր հեռանալ։

Կարծում եմ՝ Մախաչևի հետ ռևանշ մենամարտն արդեն հնարավոր չէ, քանի որ նա թոշակի է գնալու 1-2 մենամարտից հետո։ Իսկ ես կնվաճեմ այս մարզաձևը մեկ տարուց։ Տեսնելով ինձ՝ մարդիկ մտածելու են UFC-ի մասին։ Ես կդառնամ UFC-ի դեմքը։ Ինձ միայն տիտղոս է հարկավոր։

Կցանկանայի դարձյալ մենամարտել Չարլզ Օլիվեյրայի հետ։ Նա երրորդն է թեթև քաշային կարգի դասակարգման աղյուսակում և ունի BMF գոտին։ Կարծում եմ՝ այդ գոտին ավելի շատ համապատասխանում է ինձ, քան Օլիվեյրային»,- Full Send Podcast-ի եթերում ասել է հայ մարտիկը։

Հիշեցնենք, որ 29-ամյա Ծառուկյանը UFC-ում նորամուտը նշել է 2019 թվականին, նախորդ մենամարտն անցկացրել է 2025թ․ նոյեմբերի 22-ին՝ խեղդող հնարքով հաղթելով նորզելանդացի Դեն Հուկերին։ Խառը մենամարտերում Հայաստանի ներկայացուցիչը մասնակցել է 26 հանդիպման, տարել 23 հաղթանակ ու կրել 3 պարտություն։