Բրիտանայի ՊՆ-ն հայտնել է Ատլանտյան օվկիանոսում մալուխների մոտ ռուսական սուզանավերի կասկածելի ակտիվության մասին

Մեծ Բրիտանիայի պաշտպանության նախարարությունը հայտարարել է, որ Ատլանտյան օվկիանոսում հայտնաբերվել է երեք ռուսական սուզանավ, որոնք ներգրավված են եղել «չարամիտ գործունեության մեջ», նշում է Meduza-ն։

BBC News-ի կողմից հեռարձակված հատուկ մամուլի ասուլիսում պաշտպանության նախարար Ջոն Հիլին հայտարարել է, որ բրիտանական զինված ուժերը և ՆԱՏՕ-ի դաշնակիցները մի քանի շաբաթ առաջ Հյուսիսատլանտյան օվկիանոսի միջազգային ջրերում հայտնաբերել են ռուսական «Ակուլա» դասի միջուկային սուզանավ (Շուկա-Բ): Շուտով պարզվում է, որ սուզանավը «շեղում էր ուշադրությունը» Ռուսաստանի պաշտպանության նախարարության խորջրյա հետազոտությունների գլխավոր վարչության (ГУГИ) կողմից տարածքում շահագործվող երկու սուզանավերից:

Մեծ Բրիտանիայի պաշտպանության նախարարությունը պնդում է, որ սուզանավերը ներգրավված են եղել «կարևոր ստորջրյա ենթակառուցվածքների դեմ չարամիտ գործունեության մեջ», առանց մանրամասնելու, թե կոնկրետ ինչի մասին է խոսքը։

Բրիտանական զինվորականները ռուսներին հասկացել են, որ իրենց հայտնաբերել են, որից հետո սուզանավերը լքել են Հյուսիսատլանտյան օվկիանոսի այդ հատվածը, հայտնել է Մեծ Բրիտանիայի պաշտպանության նախարարությունը։

«Մենք տեսնում ենք ձեզ, տեսնում ենք ձեր ակտիվությունը մեր մալուխների և խողովակաշարերի շուրջ», – ասել է  պաշտպանության նախարարը՝ դիմելով Ռուսաստանի նախագահ Վլադիմիր Պուտինին,- և դուք պետք է իմանաք, որ վնաս պատճառելու ցանկացած փորձ անպատիժ չի մնա և կհանգեցնի լուրջ հետևանքների»։

Հրապարակման պահին ռուսական կողմը դեռ  չի  մեկնաբանել Մեծ Բրիտանիայի պաշտպանության նախարարության հայտարարությունը։

Մեծ Բրիտանիան գրեթե ամբողջությամբ ապավինում է ստորջրյա մալուխներին՝ արտաքին աշխարհի հետ կապվելու համար, որոնք ապահովում են իր ինտերնետային տրաֆիկի 99%-ը։

BBC-ի ռուսական ծառայությունը նշում է, որ սա առաջին դեպքը չէ, երբ Մեծ Բրիտանիան մեղադրում է Ռուսաստանին իր ստորջրյա մալուխների դեմ գործողությունների մեջ։

Սակայն ՊՆ-ն  նշել է, որ այս անգամ գործողությունն ավելի երկարատև և գաղտնի է եղել։ Հիլին ենթադրում է, որ Ռուսաստանը հույս ունի, որ Մերձավոր Արևելքում պատերազմը կշեղի բրիտանական զինվորականների ուշադրությունը ռուսական սուզանավերի գործունեությունից, սակայն այդ  հաշվարկը չի իրականացել։

Թարգմանությունը` Էմմա Չոբանյանի