Ղազախստանին պիտի հրավիրենք՝ Հայաստանում անցնող տարանցիկ ուղիներն օգտագործելու համար․ Փաշինյան․ ՏԵՍԱՆՅՈՒԹ

ՀՀ վարչապետ Նիկոլ Փաշինյանը լրագրողների հետ ճեպազրույցում մեկնաբանեց Հայաստանում գտնվող ղազախական պատվիրակության այցը՝ անդրադառնալով ինչպես երկաթուղու կառավարման հնարավոր փոփոխություններին, այնպես էլ տարածաշրջանային տրանսպորտային նախագծերին։

Լրագրողի հարցին՝ արդյո՞ք ղազախական կողմի հետ քննարկվում է երկաթուղու կառավարման փոխանցման հարցը, վարչապետը պատասխանեց, որ Հայաստանը որևէ քայլ չի ձեռնարկում Ռուսաստանի Դաշնության դեմ կամ նրա թիկունքում։

«Մենք Ռուսաստանի թիկունքում որևէ բան չենք պատրաստվում անել և ի հեճուկս Ռուսաստանի Դաշնության։ Քանի դեռ երկխոսության հնարավորությունները բաց են, շարունակելու ենք աշխատանքը»,- նշեց Փաշինյանը։

Անդրադառնալով ԹՐԻՓՓ-ին՝ վարչապետն ասաց, որ Ղազախստանը վաղուց հետաքրքրված է դրա հնարավորություններով՝ որպես միջազգային բեռնափոխադրումների խոշոր դերակատար։ Փաշինյանի խոսքով՝ Ղազախստանը, ինչպես նաև բազմաթիվ այլ երկրներ, փորձում են հասկանալ, թե ինչ նոր լոգիստիկ հնարավորություններ են բացվելու և ինչպես կարող են դրանք ներառել իրենց բեռնափոխադրումների շղթաներում՝ հատկապես Չինաստանից և դեպի Չինաստան հոսքերի համատեքստում։

«Մենք՝ այդ թվում Ղազախստանին պիտի հրավիրենք պատրաստ լինել Հայաստանով անցնող տարանցիկ ուղիներն օգտագործել իրենց արտահանումների, ներկրումների և իրենց կողմից մատուցվող տրանսպորտային ծառայությունների շղթայի մեջ դիտելու համար»,- ասաց Փաշինյանը։

Մանրամասները՝ տեսանյութում։