30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
«Հիշում եք այդ սառույցի կտորը». Թրամփը հանդիպել է ՆԱՏՕ-ի գլխավոր քարտուղարի հետ և կրկին խոսել Գրենլանդիայից
Քաղաքականություն
09.04.2026 | 14:18
ՆԱՏՕ-ի գլխավոր քարտուղար Մարկ Ռյուտեն Սպիտակ տանը հանդիպել է ԱՄՆ նախագահ Դոնալդ Թրամփի հետ։ Սա նրանց առաջին հանդիպումն էր այն բանից հետո, երբ Թրամփը քննադատել էր իր եվրոպացի դաշնակիցներին՝ Իրանի դեմ ԱՄՆ-ի և Իսրայելի կողմից մղվող պատերազմին միանալուց հրաժարվելու համար։
ԱՄՆ նախագահը մեկնաբանել է հանդիպումը Truth Social-ում՝ ափսոսանքով նշելով, որ «ՆԱՏՕ-ն չօգնեց մեզ, երբ մենք դրա կարիքն ունեինք»։
«ՆԱՏՕ-ն այնտեղ չէր, երբ մենք նրանց կարիքն ունեինք, և նրանք այնտեղ չեն լինի, եթե մենք նրանց կարիքը կրկին ունենանք։ Հիշում եք Գրենլանդիան՝ այդ մեծ, վատ կառավարվող սառույցի կտորը»,-նշել է Թրամփը։
Հանդիպումից հետո ՆԱՏՕ-ի գլխավոր քարտուղար Մարկ Ռյուտեն CNN-ի եթերում հայտարարել է, որ ՆԱՏՕ-ի որոշ անդամ երկրներ «չեն կատարել իրենց պարտավորությունները» ԱՄՆ-Իրան պատերազմի ժամանակ։ Հանդիպումը մեկնաբանելով՝ Ռյուտեն ասել է, որ Թրամփը «ակնհայտորեն հիասթափված է ՆԱՏՕ-ի շատ դաշնակիցներից, և ինքը հասկանում է նրա տեսակետը»։
Միևնույն ժամանակ, ՆԱՏՕ-ի գլխավոր քարտուղարն ընդգծել է, որ «եվրոպական երկրների ճնշող մեծամասնությունը» օգնել է լոգիստիկայում, տրամադրել է սեփական բազաները և այլ աջակցություն ցուցաբերել։
Թրամփի՝ Դանիայի կազմում գտնվող ինքնավար մարզ Գրենլանդիան «ձեռք բերելու» մտադրությունները ճգնաժամ էին առաջացրել ՆԱՏՕ-ի ներսում։ ԱՄՆ նախագահը հետագայում հայտարարել էր, որ կղզին ուժով գրավելու ծրագրեր չունի, բայց խոստացել, որ «չի մոռանա» ՆԱՏՕ-ի դաշնակիցների բացասական արձագանքն իր գաղափարի նկատմամբ։
Թարգմանությունը`Էմմա Չոբանյանի
