15.07.2026 | 00:59
ԱԱ-2026․ Իսպանիան հաղթեց Ֆրանսիային և դուրս եկավ եզրափակիչ․ ՏԵՍԱՆՅՈՒԹ
Իրանի պատվիրակությունն այսօր երեկոյան կժամանի Իսլամաբադ՝ ԱՄՆ-ի հետ բանակցությունների
Քաղաքականություն
09.04.2026 | 12:34
Իրանի պատվիրակությունը հինգշաբթի երեկոյան կժամանի Պակիստանի մայրաքաղաք Իսլամաբադ՝ հակամարտությունը կարգավորելու շուրջ բանակցությունների համար։ Այս մասին հայտարարել է Պակիստանում Իրանի դեսպանը։
«Չնայած Իսրայելի ռեժիմի կողմից հրադադարի ռեժիմի բազմիցս խախտումների պատճառով Իրանի հասարակության սկեպտիկ վերաբերմունքին՝ իրանական պատվիրակությունն այսօր երեկոյան կժամանի Իսլամաբադ՝ Իրանի կողմից առաջարկված 10 կետերի շուրջ լուրջ բանակցությունների համար», – X-ում նշել է դեսպան Ռեզա Ամիրի Մողադամը։
Նա չի նշել իրանական թիմի անդամների անունները։
Սպիտակ տունը հաստատել է, որ ԱՄՆ փոխնախագահ Ջեյ Դի Վենսը կգլխավորի ամերիկյան բանակցային թիմը բանակցություններում, որոնք ուղղված են պատերազմի վերջնական ավարտին հասնելուն։
Ջեյ Դեյ Վենսը հանդիպումներ կունենա այնտեղ շաբաթ օրվանից սկսած՝ ԱՄՆ նախագահ Դոնալդ Թրամփի խաղաղության առաքելությունների հարցերով հատուկ դեսպան Սթիվ Ուիթկոֆի և Թրամփի փեսայի՝ Ջարեդ Քուշների հետ միասին։
«Այս բանակցությունների առաջին փուլը տեղի կունենա շաբաթ առավոտյան՝ տեղական ժամանակով, և մենք անհամբեր սպասում ենք այդ անձնական հանդիպումներին», – ասել է Սպիտակ տան մամուլի քարտուղար Քերոլայն Լիվիթը։
Պակիստանի իշխանությունները ուժեղացրել են երկրի մայրաքաղաքում անվտանգությունը՝ տեղակայելով հարյուրավոր լրացուցիչ ոստիկանական և ռազմականացված ուժեր ԱՄՆ-ի և Իրանի միջև սպասվող բանակցություններից առաջ։ Մոտակա հյուրանոցը, որտեղ, ինչպես սպասվում է, կտեղակայվեն պատվիրակությունները, վերցվել է ուժեղացված հսկողության տակ։
Թարգմանությունը`Էմմա Չոբանյանի
