Թրամփն ու Էրդողանը հեռախոսազրույցում քննարկել են Իրանի հետ հրադադարը

Թուրքիայի նախագահ  Ռեջեփ Թայիփ Էրդողանը հեռախոսազրույց է ունեցել ԱՄՆ նախագահ Դոնալդ Թրամփի հետ։

Թուրքիայի նախագահականի հաղորդակցության վարչության հաղորդմամբ`զրույցի ընթացքում առաջնորդները քննարկել են տարածաշրջանում տեղի ունեցող զարգացումները, այդ թվում՝ երեկ երեկոյան Իրանի վերաբերյալ հայտարարված հրադադարը։

«Հայտնելով իր գոհունակությունը հրադադարի վերաբերյալ՝ մեր նախագահը նշել է, որ ամբողջ աշխարհի համար բավականին դժվար և մարտահրավերներով լի 40 օրից հետո բացված երկշաբաթյա հնարավորությունների պատուհանը պետք է շատ լավ օգտագործվի երկարատև խաղաղության համաձայնագրի համար, և որ չպետք է որևէ հնարավորություն տրվի գործընթացը խաթարելու համար», – ասվում է հայտարարության մեջ։

Էրդողանը շեշտել է, որ Թուրքիայի աջակցությունը բարեկամական և եղբայրական երկրների`մասնավորապես Պակիստանի հետ  հակամարտությունների կարգավորման ջանքերին կշարունակի աճել։

Ավելի վաղ թուրքական լրատվամիջոցները հայտնել էին` Թուրքիայի Ազգային հետախուզական կազմակերպությունը, որը հայտնի է որպես MIT, հակամարտության սկզբից ի վեր կենտրոնական դեր է խաղացել ԱՄՆ-Իսրայելական դաշինքի և Իրանի միջև ճգնաժամի կառավարման գործում։

Թուրքական պետական ​​TRT հեռուստաալիքի կողմից հղում կատարած անվտանգության աղբյուրների համաձայն՝ հետախուզական գործակալությունը համակարգել է իր գործողությունները ավելի քան 13 երկրների, այդ թվում՝ ԱՄՆ-ի, Իրանի, Պակիստանի, Սաուդյան Արաբիայի և Գերմանիայի հետ, որպեսզի պատերազմը չվերածվի ավելի լայն տարածաշրջանային հակամարտության։

MIT ը նշվում է որպես այն քիչ մեխանիզմներից մեկը, որը կարող է միաժամանակ ուղիղ կապ պահպանել ինչպես Արևմտյան դաշինքի, այնպես էլ Իրանի հետ։

«MIT-ը բաց էր պահում կողմերի միջև հաղորդակցության ուղիները, աշխատում էր կանխել թյուրըմբռնումները և փոխանցում լարվածության նվազեցմանն ուղղված ռազմավարական ուղերձները», – ասել են աղբյուրները։

Թարգմանությունը`Էմմա Չոբանյանի