Միջոցներ ենք փնտրում՝ տնային կալանքում գտնվողների ընտրության մասնակցությունն ապահովելու համար. Ջուլհակյան. ՏԵՍԱՆՅՈՒԹ

Ազգային ժողովի նիստում պատգամավոր Արուսյակ Ջուլհակյանը ներկայացրեց օրենսդրական նախագծի առաջինից երկրորդ ընթերցում ընկած ժամանակահատվածում կատարված փոփոխությունները։

Ջուլհակյանը նշեց, որ կատարված շտկումները հիմնականում տեխնիկական էին. «Ըստ էության, իմ առաջարկների հիման վրա երկու տեխնիկական շտկում է կատարվել, այսինքն՝ տեխնիկական բնույթի փոփոխություն է կատարվել»։

Ելույթի ընթացքում Ջուլհակյանն առանձնակի անդրադարձ կատարեց «Հայաստան» խմբակցության կողմից բարձրացված խնդրին, որը վերաբերում էր տնային կալանքի տակ գտնվող անձանց ընտրական իրավունքին։ Նա փաստեց, որ թեև իրավունքը սահմանադրորեն ամրագրված է, սակայն գործնականում կան խոչընդոտներ. «Չնայած այն բանին, որ Սահմանադրությամբ ամրագրված է նաև տնային կալանքի մեջ գտնվող անձանց քվեարկությանը մասնակցելու իրավունքը, բայց տեխնիկապես այս պահին չի ապահովվում այդ իրավունքի իրացումը»։

Պատգամավորը պարզաբանեց, թե ինչու տվյալ փուլում հնարավոր չեղավ ընդունել առաջարկված փոփոխությունը։ Ըստ նրա՝ պատճառը ժամանակի սղությունն ու լրացուցիչ քննարկումների անհրաժեշտությունն էր. «Հաշվի առնելով կարճ ժամանակը մինչև երկրորդ ընթերցում ընկած ժամանակահատվածում՝ մենք ստիպված եղանք առաջարկը մերժել… օրենքում ամրագրել մի բան, որը դեռևս չի քննարկվել կառավարության շրջանում, որոշեցինք չանել»։

Այնուամենայնիվ, Ջուլհակյանը հավաստիացրեց, որ հարցը լուծման փուլում է. «Միջգերատեսչական աշխատանքային խումբը այս ուղղությամբ աշխատում է և հիմա միջոցներ են փնտրում, թե ինչպես պետք է տեխնիկապես այդ իրավունքի իրացումն ապահովեն տնային կալանքի մեջ գտնվող անձանց համար»։

Ելույթի ավարտին նա տեղեկացրեց, որ նախագիծը ստացել է դրական եզրակացություն և կոչ արեց գործընկերներին քվեարկության ժամանակ կողմ քվեարկել այս նախագծին։