Հանձնառու ենք պատշաճ պայմաններ ապահովել մարզիկների համար՝ միշտ նոր հաղթանակներ գրանցելու անխախտ նպատակադրմամբ. ԿԳՄՍ նախարար

ՀՀ ԿԳՄՍ նախարար Ժաննա Անդրեասյանն ու նախարարի տեղակալ Հասմիկ Ավագյանը Սպորտի միջազգային օրվա առթիվ այցելել են Արմավիրի մարզի Գեղակերտ համայնք՝ Օլիմպիական խաղերի մեդալակիր, ԽՍՀՄ եռակի չեմպիոն, Եվրոպայի և աշխարհի կրկնակի չեմպիոն, աշխարհի բազմակի ռեկորդակիր Յուրի Սարգսյանի անվան ծանրամարտի մարզադպրոց։

ԿԳՄՍՆ-ի փոխանցմամբ՝ Խոյ համայնքի Գեղակերտ բնակավայրի ծանրամարտի մարզադպրոցում, որտեղ մարզվել է հայտնի մարզիկը, պետության աջակցությամբ կիրականացվեն վերակառուցման և բարեկարգման աշխատանքներ:

Յուրի Սարգսյանի ուղեկցությամբ ԿԳՄՍ նախարարն ու նախարարի տեղակալը շրջել են ծանրամարտի մարզադպրոցում, ծանոթացել ենթակառուցվածքային պայմաններին, զրուցել մարզվողների հետ: Շնորհավորելով սպորտի միջազգային օրվա առթիվ՝ ԿԳՄՍ նախարարը շնորհակալություն է հայտնել Յուրի Սարգսյանին սպորտում անուրանալի ներդրման համար:

«Վստահ եմ՝ այստեղ մարզվող երեխաների համար Դուք և Ձեր անցած ուղին ոգեշնչման աղբյուր են՝ կերտելու իրենց սեփական ճանապարհը: Մենք էլ՝ որպես պետություն, հանձնառու ենք պատշաճ պայմաններ ապահովել մարզիկների համար՝ միշտ նոր հաղթանակներ գրանցելու անխախտ նպատակադրմամբ»,- ասել է Ժաննա Անդրեասյանը:

Յուրի Սարգսյանը շնորհակալություն է հայտնել շնորհավորանքի համար և հավաստիացրել, որ պետության աջակցությունը մեծապես նպաստում է ոլորտի զարգացմանն ու երեխաների շրջանում ոգևորության ամրապնդմանը:

Նախարարը նաև ծանոթացել է առկա խնդիրներին, քննարկել մարզադպրոցի վերակառուցմանը, շենքային պայմանների բարելավմանն ու գույքային հագեցվածությանն առնչվող հարցեր։ Ժաննա Անդրեասյանը համոզմունք է հայտնել, որ ենթակառուցվածքների արդիականացումն ու բարելավված պայմանները կստեղծեն առավել նպաստավոր միջավայր՝ երեխաների ավելի մեծ թվի ներգրավման համար, ինչպես նաև կնպաստեն մարզական բարձր արդյունքների գրանցմանը։

Ներկայում Գեղակերտի ծանրամարտի մարզադպրոցում մարզվում են շուրջ 200 սաներ, որոնք ընդգրկված են Հայաստանի տարբեր տարիքային հավաքականներում՝ գրանցելով նշանակալի հաջողություններ։