Քաղաքականություն
06.04.2026 | 18:27
Հայ Ազգային Կոնգրեսը հայտարարել է, որ չնայած «Ուժեղ Հայաստան»-ի հետ դաշինք ձևավորելու փորձերին, այն չի կայացել, և կուսակցությունը կմասնակցի ընտրություններին առանձին՝ միաժամանակ պատրաստ լինելով համագործակցել ընդդիմադիր ուժերի հետ ընտրություններից առաջ և հետո։
«Հայ Ազգային Կոնգրեսը բոլոր անհրաժեշտ ջանքերը գործադրեց Սամվել Կարապետյանի ղեկավարած «Ուժեղ Հայաստանի» հետ գալիք ընտրություններում ազգակործան ռեժիմի դեմ մեծ դաշինք ստեղծելու նպատակով:
Դրսևորել ենք առավելագույն ճկունություն՝ դաշինքի ստեղծման համար որեևէ նախապայման չդնելով: Մեզանից անկախ պատճառներով այդ դաշինքը չկայացավ:
Հայ Ազգային Կոնգրեսը, հետևաբար, կմասնակցի ընտրություններին առանձին` միևնույն ժամանակ պատրաստ լինելով համագործակցել ինչպես «Ուժեղ Հայաստանի», այնպես էլ քաղաքական այլ ընդդիմադիր ուժերի հետ և´ ընտրական ժամանակաշրջանում, և´ընտրություններից հետո խորհրդարանում կոալիցիա կազմելու և երկիրը վերահաս սպառնալիքներից փրկելու գործում»,- ասված է հայտարարությունում։
Հիշեցնենք, որ ՀՀ առաջին նախագահ Լևոն Տեր-Պետրոսյանի ղեկավարած ՀԱԿ-ը հայտարարեց, որ մասնակցելու է 2026-ի հերթական խորհրդարանական ընտրություններին և որ վարչապետի թեկնածուն վարչության փոխնախագահ Լևոն Զուրաբյանն է։
Ապա ՀԱԿ ղեկավար Լևոն Տեր-Պետրոսյանը հայտարարել էր, որ «Պառակտված ընդդիմությանը միավորելու միակ կարող ուժը «Ուժեղ Հայաստանի» առաջնորդ Սամվել Կարապետյանն է»։
