Իրանը ձևակերպել է իր պատասխանը հրադադարի առաջարկներին. Իրանի ԱԳՆ խոսնակ

Իրանը ձևակերպել է իր դիրքորոշումներն ու պահանջները՝ ի պատասխան միջնորդների միջոցով վերջերս ներկայացված հրադադարի առաջարկների։ Այս մասին ասել է Իրանի արտաքին գործերի նախարարության խոսնակը՝ հավելելով, որ բանակցությունները «անհամատեղելի են վերջնագրերի և պատերազմական հանցագործություններ կատարելու սպառնալիքների հետ», գրում է France 24-ը։

Մամուլի խոսնակ Էսմայիլ Բաղային ասել է, որ Թեհրանն ունի պահանջների մի շարք, որոնք հիմնված են իր ազգային շահերի վրա և արդեն փոխանցվել են միջնորդական ուղիներով՝ հավելելով, որ ԱՄՆ-ի նախկին պահանջները, ինչպիսին է 15 կետանոց ծրագիրը, մերժվել են «չափազանց» լինելու պատճառով։

«Իրանը չի տատանվում հստակ արտահայտել այն, ինչը համարում է իր օրինական պահանջները, և դա անելը չպետք է մեկնաբանվի որպես փոխզիջման նշան, այլ որպես իր դիրքորոշումները պաշտպանելու վստահության արտացոլում», – ասել է Բաղային մամուլի ասուլիսում։

«Մենք ձևակերպել ենք մեր սեփական պատասխանները» և մանրամասները կհայտարարենք ժամանակին, հավելել է նա՝ ի պատասխան իրանցի լրագրողի հարցին, որը վերաբերում էր Իրանի և ԱՄՆ-ի միջև հրադադարի հաստատմանն ուղղված շարունակական ջանքերին։

Սա հաջորդում է Reuters-ի՝ անանուն աղբյուրներին հղումով տարածած հաղորդագրությանը, որ Պակիստանը մեծ դեր է խաղում հակամարտությանը վերջ դնելու նոր ծրագրի մշակման գործում։ Աղբյուրը նշում է, որ Պակիստանը մշակել և գիշերը Իրանի և ԱՄՆ-ի հետ փոխանակել է ռազմական գործողությունները դադարեցնելու շրջանակ, որը ուրվագծում է երկաստիճան մոտեցում՝ անհապաղ հրադադարով, որին կհաջորդի համապարփակ համաձայնագիր։

Թարգմանությունը`Էմմա Չոբանյանի