02.07.2026 | 20:24
ՔՊ խմբակցության ղեկավարի թեկնածու է ընտրվել Արուսյակ Մանավազյանը. Նիկոլ Փաշինյան. ՏԵՍԱՆՅՈՒԹ
ԱՄՆ-ն, Իրանը և միջնորդները քննարկում են 45-օրյա հրադադարը. Axios
Քաղաքականություն
06.04.2026 | 10:25
ԱՄՆ-ն, Իրանը և տարածաշրջանային միջնորդների խումբը քննարկում են 45-օրյա հրադադարի պայմանները, որը կարող է հանգեցնել պատերազմի մշտական դադարեցմանը։ Այս մասին հաղորդել է Axios-ը՝ հղում անելով բանակցություններից տեղյակ ամերիկյան, իսրայելական և տարածաշրջանային չորս աղբյուրների, գրում է Reuters-ը։
Սպիտակ տունը և ԱՄՆ Պետդեպարտամենտը անմիջապես չեն արձագանքել Reuters-ի մեկնաբանության խնդրանքներին։
Ըստ Axios-ի՝ բանակցությունները տեղի են ունենում Պակիստանի, Եգիպտոսի և Թուրքիայի միջնորդների, ինչպես նաև ԱՄՆ նախագահի դեսպան Սթիվ Ուիթկոֆի և Իրանի արտգործնախարար Աբբաս Արաղչիի միջև նամակագրության միջոցով։ Ամերիկացի պաշտոնյայի խոսքով՝ վերջին օրերին Վաշինգտոնը մի քանի առաջարկ է փոխանցել Թեհրանին, սակայն դրանցից ոչ մեկը դեռևս չի ընդունվել։
Նշվում է, որ միջնորդները քննարկում են երկու փուլով գործարքը։ Առաջին փուլը կլինի հնարավոր 45-օրյա հրադադար, որի ընթացքում կբանակցվի պատերազմի մշտական դադարի մասին։ Երկրորդ փուլը կլինի պատերազմի ավարտի վերաբերյալ համաձայնագիր։ Նաև նշվում է,որ հրադադարը կարող է երկարաձգվել, եթե բանակցությունների համար լրացուցիչ ժամանակ պահանջվի։
Կիրակի օրը ԱՄՆ նախագահ Դոնալդ Թրամփը Wall Street Journal-ին տված հարցազրույցում ասել էր, որ Իրանի համար Հորմուզի նեղուցը բացելու վերջնաժամկետը երեքշաբթի երեկոն է, հակառակ դեպքում կարևորագույն ենթակառուցվածքների վրա հարձակումներ կլինեն։
Թարգմանությունը`Էմմա Չոբանյանի
