17.08.2026 | 18:00
ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահի թեկնածուն Լիլիթ Գալստյանն է
Իրանն ու ԱՄՆ-ն ստացել են ռազմական գործողությունները դադարեցնելու և անհապաղ հրադադարի ծրագիրը. Reuters
Քաղաքականություն
06.04.2026 | 15:35
Իրանը և ԱՄՆ-ն ստացել են ռազմական գործողությունները դադարեցնելու ծրագիր, որը կարող է ուժի մեջ մտնել այսօր և վերաբացել Հորմուզի նեղուցը․ հայտնել է առաջարկներին ծանոթ աղբյուրը Reuters-ին։
Աղբյուրը նշում է, որ Պակիստանը մշակել և գիշերը Իրանի և ԱՄՆ-ի հետ փոխանակել է ռազմական գործողությունները դադարեցնելու շրջանակ, որն ուրվագծում է երկաստիճան մոտեցում՝ անհապաղ հրադադարով, որին կհաջորդի համապարփակ համաձայնագիր։
«Բոլոր տարրերը պետք է համաձայնեցվեն այսօր», – ասում է աղբյուրը՝ հավելելով, որ նախնական փոխըմբռնումը կկառուցվի որպես փոխըմբռնման հուշագիր։ Այն էլեկտրոնային եղանակով կավարտվի Պակիստանի միջոցով, որը բանակցությունների միակ հաղորդակցման ուղին է։
Axios-ը առաջինն էր հաղորդել, որ Միացյալ Նահանգները, Իրանը և տարածաշրջանային միջնորդները քննարկում են 45-օրյա հնարավոր հրադադարը՝ որպես երկփուլ համաձայնագրի մաս, որը կարող է հանգեցնել պատերազմի մշտական դադարեցման, հղում անելով ԱՄՆ-ի, Իսրայելի և տարածաշրջանային աղբյուրներին։
Աղբյուրը Reuters-ին հայտնել է, որ Պակիստանի բանակի գլխավոր մարշալ Ասիմ Մունիրը «ամբողջ գիշեր» կապի մեջ է եղել ԱՄՆ փոխնախագահ Ջեյ Դի Վենսի, հատուկ դեսպան Սթիվ Ուիթկոֆի և Իրանի արտաքին գործերի նախարար Աբբաս Արաղչիի հետ։
Առաջարկի համաձայն՝ հրադադարը ուժի մեջ կմտնի անմիջապես, որի արդյունքում կվերաբացվի Հորմուզի նեղուցը՝ 15-20 օր ժամանակ տալով ավելի լայն համաձայնագիր կնքելու համար։ Գործարքը, որը նախնական անվանումով կոչվում է «Իսլամաբադի համաձայնագիր», կներառի նեղուցի տարածաշրջանային շրջանակ, իսկ վերջնական անձնական բանակցությունները կանցկացվեն Իսլամաբադում։
ԱՄՆ-ի և Իրանի պաշտոնյաների կողմից անհապաղ արձագանք դեռևս չկա։ Պակիստանի արտաքին գործերի նախարարության խոսնակ Թահիր Անդրաբին հրաժարվել է մեկնաբանություն տալ։
Աղբյուրը նշում է, որ վերջնական համաձայնագիրը, ինչպես սպասվում է, կներառի Իրանի պարտավորությունները՝ չստեղծել միջուկային զենք՝ պատժամիջոցների մեղմացման և սառեցված ակտիվների ազատման դիմաց։
Երկու պակիստանյան աղբյուրներ նշում են, որ Իրանը դեռևս պարտավորություններ չի ստանձնել՝ չնայած քաղաքացիական և ռազմական ակտիվացմանը։
Բացի այդ՝ իրանցի պաշտոնյան Reuters-ին հայտնել է, որ Իրանը չի վերաբացի Հորմուզի նեղուցը ժամանակավոր հրադադարի շրջանակներում և չի ընդունի որևէ ժամկետ առաջարկը վերանայելու համար։
Հրադադարի ծրագրի մասին հաղորդագրությունները տարածվել են այն բանից հետո, երբ ԱՄՆ նախագահ Դոնալդ Թրամփը Իրանին նոր ժամկետ տվեց նեղուցը վերաբացելու համար։
Թարգմանությունը`Էմմա Չոբանյանի
