Իրանը հարվածներ է հասցրել Պարսից ծոցի մի շարք երկրների

Իրանի հարձակման հետևանքով հրդեհ է բռնկվել Արաբական Միացյալ Էմիրություններում գտնվող նավթաքիմիական ձեռնարկությունում։ Այդ մասին կիրակի՝ ապրիլի 5-ին, հայտնել է Աբու Դաբիի կառավարության մամուլի ծառայությունը։ Խոսքը վերաբերում է Borouge ընկերության գործարանին, պարզաբանել են իշխանությունները։

Աբու Դաբիում նշել են, որ մի քանի հրդեհների պատճառ են դարձել խոցված օդային թիրախների ընկած բեկորները։ Ձեռնարկության գործունեությունը ժամանակավորապես դադարեցվել է, մասնագետները գնահատում են վնասը։ Տուժածների մասին տեղեկություններ չեն հաղորդվել։

Դեպքից քիչ առաջ ԱՄԷ պաշտպանության նախարարությունը հայտարարել էր մի քանի իրանական հրթիռների և անօդաչու թռչող սարքերի խոցման մասին։ Արաբական Միացյալ Էմիրությունները Պարսից ծոցի այն երկրներից է, որտեղ տեղակայված են ամերիկյան ռազմական բազաներ, և որոնք ավելի հաճախ են ենթարկվում Իրանի հարձակումներին․ Թեհրանն այդպես է արձագանքում ԱՄՆ-ի և Իսրայելի հարվածներին։

Միևնույն ժամանակ Բահրեյնի ազգային նավթագազային ընկերությունը՝ Bapco Energies-ն, հայտնել է, որ իրանական հարձակման հետևանքով հրդեհ է բռնկվել իր պահեստարաններից մեկում։ Կրակը մարվել է, այժմ գնահատվում է վնասը, ընդգծել են Մանամայում։ Տուժածների մասին տեղեկություններ չեն ստացվել։

Իրանական անօդաչուների հարձակման մասին հայտնել է նաև բահրեյնական նավթաքիմիական Gulf Petrochemical Industries ընկերությունը։ Ըստ ընկերության՝ արտադրական օբյեկտներում հրդեհներ են բռնկվել, որոնք հաջողվել է մարել։ Տուժածների մասին տեղեկություններ չեն հաղորդվել։