«Ռոսսելխոզնադզոր»-ի ղեկավարը խոսել է «Հայաստանից ներմուծվող ապրանքների վերաբերյալ շարունակական բողոքների մասին»

«Հայաստանից Ռուսաստան մատակարարվող բուսական և անասնապահական արտադրանքի վերաբերյալ մի քանի տարի առաջ առաջացած բողոքները շարունակվում են։ Այս խնդրի լուծումը կարող է լինել Եվրասիական տնտեսական միության (ԵՏՄ) շրջանակներում տեղեկատվական համակարգերի ինտեգրումը, որը կապահովի արտադրանքի հետագծելիությունը»,- հայտարարել է «Ռոսսելխոզնադզոր»-ի ղեկավար Սերգեյ Դանկվերտը, գրում է Ինտերֆաքսը։

«Հայաստանից ներմուծվող ապրանքների տեսականին և քանակը ենթադրում են, որ դրանցից ոչ բոլորը հայկական ծագում ունեն։ Մենք այս հարցին անդրադարձել ենք և՛ 2024, և՛ 2023 թվականներին», – ասել է Դանկվերտը «Ռոսիա 24» հեռուստաալիքին տված հարցազրույցում։

Ըստ նրա՝ առաջին հերթին, խոսում են ապրանքների մատակարարումների «անտրամաբանական աճի» մասին, որը ԵՏՄ-ի շրջանակներում շուկա մուտք գործելու պարզեցված ռեժիմի հետևանք է։ «Օրինակ, երեք տարվա ընթացքում Հայաստանը ծաղիկների առաքումները 36 միլիոնից ավելացրել է մինչև ավելի քան 100 միլիոնի։ Աճ է գրանցվել նաև այլ ապրանքների առաքումների մեջ։ Մենք ստիպված էինք բուսասանիտարական ստուգումները տեղափոխել սահմանին ավելի մոտ»,- ասել է նա։

«Մենք այս հարցերը բավականին երկար ժամանակ կարգավորում ենք և տեսնում ենք իսկապես մեծ թվով կարանտինային ապրանքներ. Հայաստանից հայտնաբերվում է ավելի քան 900 կարանտինային ապրանք, ինչը զգալիորեն բարդացնում է մեր աշխատանքը: Օրինակ, մենք պետք է դրանք ախտահանենք: Մենք պետք է հավաստագրենք արտադրական վայրերը գույնի հիման վրա, և մենք փորձել ենք տեսաստուգումներ»։

Ըստ նրա՝ այս ամենը հանգեցրել է Հայաստանից առաքումների նկատմամբ ավելի խիստ պահանջների կիրառմանը։

Դանկվերտը ստեղծված իրավիճակից դուրս գալու ելքը տեսնում է ԵՏՄ-ի շրջանակներում անվտանգության վերահսկողության տեղեկատվական համակարգերի ինտեգրման մեջ։

«Մեր էլեկտրոնային համակարգերը թույլ են տալիս մեզ արագ հետևել մատակարարվող ապրանքներին  և արդյունավետ գործել», – ասել նա՝ նշելով, որ համագործակցության շրջանակներում «դա դեռևս չի ստացվում»։

Թարգմանությունը՝ Էմմա Չոբանյանի