Պատրաստվում ենք նրանց վերադարձնել քարե դար, որտեղ նրանց տեղն է․ Թրամփը՝ Իրանի մասին

ԱՄՆ նախագահ Դոնալդ Թրամփը հերթական ուղերձում հայտարարել, որ ամերիկյան զորքերը շուտով «կավարտեն անելիքը Իրանի պատերազմում», քանի որ «հիմնական ռազմավարական նպատակները մոտ են իրականացմանը», գրում է DW-ի ռուսական ծառայությունը։

«Մենք պատրաստվում ենք նրանց (Իրանին) չափազանց ուժեղ հարվածներ հասցնելու առաջիկա երկու-երեք շաբաթվա ընթացքում։ Մենք  պատրաստվում ենք նրանց վերադարձնել  քարե դար, որտեղ նրանց տեղն է», – ասել է  Թրամփը։ Նա նաև սպառնացել է, որ եթե Իրանը հրաժարվի ընդունել Վաշինգտոնի պայմաններով գործարքը, ԱՄՆ-ն «շատ ուժեղ հարված կհասցնի նրանց բոլոր էլեկտրակայաններին, հավանաբար, միաժամանակ»։

Բացի այդ՝ ԱՄՆ նախագահը կրկին կոչ է արել այն երկրներին, որոնք կախված են Իրանի կողմից փակված Հորմուզի նեղուցով նավթի մատակարարումներից, ինքնուրույն ազատել այն։

«Աշխարհի երկրները, որոնք նավթ են ստանում Հորմուզի նեղուցով, պետք է հոգ տանեն այս անցուղու մասին։ Նրանք պետք է գնահատեն այն։ Նրանք պետք է գրավեն այն և խնամեն այն։ Նրանց մոտ հեշտությամբ կստացվի։ Գնացե՛ք նեղուց և պարզապես վերցրեք այն։ Պաշտպանե՛ք այն։ Օգտագործե՛ք այն ձեզ համար»,- ասել է  Թրամփը՝ նշելով, որ Միացյալ Նահանգներն այս երթուղու կարիքը չունի։

ԱՄՆ նախագահի 20 րոպեանոց ելույթը հեռարձակվել է Associated Press-ի կողմից: Լրատվամիջոցների ներկայացուցիչներին թույլ չեն տվել ներկա գտնվել Թրամփի ելույթին: Սպիտակ տունը իր կայքում հրապարակել է նրա ելույթի տեսանյութը, ապա հեռացրել այն՝ առանց մեկնաբանելու հեռացման պատճառները:

«Նրանց մոտ ռեժիմը փոխելը իմ ծրագրերի մեջ չէր մտնում։ Իմ նպատակը մեկն էր՝ կանխել նրանց միջուկային զենք մշակելը, և այդ նպատակին հասել ենք։  Մենք ավարտում ենք աշխատանքը, և կարծում եմ, որ դա կտևի, գուցե, երկու շաբաթ, գուցե, մի քանի օր ավելի։ Բայց մենք ուզում ենք ոչնչացնել նրանց ունեցած ամեն ինչ», – Թրամփի խոսքերը մեջբերել է CNN-ը։

Թարգմանությունը՝ Էմմա Չոբանյանի