Եկեղեցականներ են հրավիրվել ԱԺ լսումներին, սակայն չեն եկել․ նամակ են ուղարկել․ ՏԵՍԱՆՅՈՒԹ

ԱԺ «Պատիվ ունեմ» խմբակցությունը նախաձեռնել է խորհրդարանական լսումներ պետություն-ազգային եկեղեցի հարաբերությունների ներկա վիճակի առնչությամբ, ու դրա արդյունքներով նախատեսվում է Ազգային ժողովի հայտարարություն ընդունել։

Լսումները վարող, ԱԺ «Պատիվ ունեմ» խմբակցության ղեկավար Հայկ Մամիջանյանը հայտարարեց՝ դիմել են բոլոր շահագրգիռ կողմերին, ինչպես նաև Հայ Առաքելական Սուրբ եկեղեցուն։ Լսումներին մասնակից եկեղեցականներ չկային, Մայր Աթոռից նամակ են ուղարկել, որն էլ ընթերցեց վարողը․

«Ողջունում ենք սույն նախաձեռնությունը, որը միտված է գնահատելու պետության կյանքում Առաքելական մեր Սուրբ եկեղեցու դերակատարությունը և ընդգծելու Հայաստանի Հանրապետության Սահմանադրության և միջազգային պարտավորությունների շրջանակներում իշխանությունների կողմից եկեղեցու ներքին ինքնավարությանը չմիջամտելու անհրաժեշտությունը։ Ցավում ենք, որ Ավագ հինգշաբթի օրվա ծիսական արարողությունների պատճառով հնարավոր չպիտի լինի եկեղեցականի մասնակցությունը հրավիրված լսումներին։ Առ Աստված աղոթքով մաղթում ենք ձեզ քաջառողջություն, գործոց հաջողություններ և ամենայն բարիք»։

Մամիջանյանի խոսքով՝ իսկապես խորհրդանշական է, որ քրիստոնեական տոնածիսական կյանքի կարևորագույն ժամանակաշրջաններից մեկի ժամանակ, Սուրբ Զատիկին նախորդող Ավագ շաբաթվա ընթացքում, և իրենք հարկադրված են կազմակերպել այս քննարկումը, այս լսումները, պաշտպանելու Հայ Առաքելական եկեղեցու իրավունքը՝ իրականացնելու, կազմակերպելու հենց այդ ծիսակարգերը։

Մանրամասները՝ տեսանյութում։